Вицепремиерот за економски прашања Фатмир Битиќи истакна оти резултатите од пописот ги гледа како бројки на кои треба заеднички да работиме и како што истакна, „да работиме за нашите генерации, за нашите деца да не одат за после 10 години да жалиме што отишле“
Да работиме за сите наши сограѓани кои, за жал, во овие 20 години не напуштиле, да креираме една подобра иднина за да се вратат, да работиме за нашите генерации, за нашите деца за да не одат за да после 10 години жалиме што отишле.
Ова на прес-конференција денеска го изјави вицепремиерот за економски прашања Фатмир Битиќи и додаде оти податоците од пописот доаѓаат во вистински момент и оти се појдовна точка за креирање нова визија и правец за движење и развој на нашата земја.
„Јас ги гледам податоците и резултатите на пописот како бројки во коишто треба сите заеднички да работиме. Да работиме за сите наши сограѓани коишто за жал во овие 20 години не напуштиле за да креираме една подобра иднина за да се вратат, да работиме за нашите генерации, за нашите деца за да не одат за да после 10 години жалиме што отишле. И тоа е за мене најбитно од резултатите од пописот“,
рече Битиќи во одговор на новинарско прашање пред почетокот на конференцијата „Инфраструктурата го поттикнува развојот и ја поддржува климатската акција“.
Токму конференцијата Битиќи ја оцени како обид да се врати вербата на граѓаните во институциите и во важноста на државата да испорача квалитетен живот за граѓаните. Тој истакна оти инфраструктурните проекти значат квалитет и подобрување на квалитет на животот.
„Јас сум еден од тие којшто наместо да креираме мерка за денеска сакам да предвидам многу подолго за да им дадам на луѓето појасна визија во каква земја ќе живеат. Мерките секако се добредојдени и мислам дека секој којшто е отворени низ инклузивен процес треба да ги дава. Сметам дека резултатите од вчерашниот попис покажаа неколку работи коишто недостигаат. Во овој момент во државата се одвива процес на креирање на Националната развојна стратегија која што би требало да и даде правец на државата во наредните 10-20 години“,
посочи Битиќи.
Резултатите од пописот, како што посочи Битиќи, ја покажаа убавината на нашата земја, а тоа, како што кажа, е разноликоста што постои во нашата земја.
„Мислам дека немаше подобар ден за објава на резултатите од пописот после успехот којшто го постигна фудбалската репрезентација и еден ден претходно на мечот со Португалија што токму таа различност на луѓето коишто се дел од тимот покажа како може да се постигне успех“,
нагласи Битиќи.