Потпретседателот на СДСМ, Венко Филипче, најави дека Клиничкиот центар кој ќе се изгради во Општина Ѓорче Петров ќе биде единствен на целиот Западен Балкан
Ги препознавме вистинските потреби на граѓаните и 50-тина милиони евра обезбедивме за раздолжување на општините и 150 милиони евра за патишта и канализациони и водоводни мрежи, за олеснување на животот на граѓаните, рече потретседателот на СДСМ, Венко Филипче на вечерашната партиска трибина во Општина Ѓорче Петров.
Филипче додаде дека актуелниот градоначалник Александар Наумовски се изборил да ја промовира месноста Велеполе и таа е најдоброто место за да биде лоциран новиот Клинички центар.
„Тука до израз дојде визионерството на Наумовски, кој покрај Клиничкиот центар, во околината има намера да изгради нови спортски терени и нов студентски дом“,
рече Филипче.
Според него, новиот Клинички центар ќе има над 1 000 кревети и ќе биде изграден на над 100 илјади метри квадратни.
„Ќе ги надминеме блокадите на ВМРО-ДПМНЕ. Зарем ќе ги делиме пациентите? Таму можеби ќе се лекуваат нашите мајки, баби, а не дај Боже и ние. Таму ќе се нуди најсовремена медицинска услуга и овој центар ќе биде еден и единствен на целиот Западен Балкан. Нема иднина со луѓето што ја прават блокадата, нема иднина со антиваксерите, нема иднина со луѓето што нас не нарекуваат убијци“,
рече Филипче.
Тој додаде дека Клиничкиот центар ќе биде изграден и покрај сите обиди на ВМРО-ДПМНЕ тоа да го спречат.
„Знам дека вие граѓаните на 17 октомври ќе го заокружите бројот 12 за вашата иднина, за иднината на вашите, нашите следни поколенија тука во државата, не во странство, за развиени просперитетни општини, населби и градови, за европска Северна Македонија, за Наумоски, за развиена општина Ѓорче Петров“,
рече Филипче.