Лидерот на ВМРО-ДПМНЕ во Виница го промовираше Миле Петков за кандидат за градоначалник, а пратеникот Антонио Милошоски од Зрновци најави победа во прв круг за нивниот кандидат Борчо Коцев
Ниту еден збор не кажуваат што направија изминативе четири години кандидатите на СДСМ, само критикуваат, рече лидерот на ВМРО-ДПМНЕ, Христијан Мицкоски на вечерашниот митинг во Виница.
Таму беше промовиран Миле Петков како кандидат за градоначалник.
Мицкоски најави дека по 17 октомври власта ја чека голем пораз, нова влада и одговорност за стореното во изминатите четири години.
„Кога би можел сега да имам некоја временска машина и да го вратам оној наш последен дуел и на прашањето што би му порачале на Зоран Заев би му кажал извади го тефтерот, извади го календарот и прочитај колку години си власт. Заборава дека тој и неговите мали зоранчиња четири години не пустошат, а она што најмногу умеат да го прават тоа е да крадат и да лажат“,
рече Мицкоски.
Тој повтори дека Македонија е најкриминалната држава со најкорумпирани политичари, дека народот никогаш не живеел полошо, порди што, како што рече, овие избори се шанса за промена.
Антонио Милошоски, пратеник и член на Извршниот комитет на ВМРО – ДПМНЕ на митингот во Зрновци го промовираше Борчо Коцев како кандидат за градоначалник.
„Победата во прв круг ќе биде голем елан и за останатите општини. Нашиот иден градоначалник Борчо Коцев има одлична стартна основа за работата понатаму, а во многу скоро време премиер ќе биде Христијан Мицкоски“,
кажа Милошоски.
Според него овие избори имаат локално, но и политичко значење за цела Македонија.
Љупчо Папазов, кандидат за градоначалник на Кочани од редовите на ВМРО-ДПМНЕ на вечерашниот минитинг најави промени за успешно справување со проблемите.