За денеска во 15 часот е закажана свечената собраниска седница на која ќе се ратификува Северноатлантскиот договор за членство на нашата земја во НАТО.
На седницата е поканет да присуствува речиси целиот државен и политички врв во земјава, а најавено е и обраќање на претседателот на државата, Стево Пендаровски.
Исто така, на свечената седница поканети се и гости од седиштето на НАТО и од земјите членки во регионот.
Според сценариото за одржување на седницата, по нејзиното завршување, знамето на НАТО ќе биде подигнато на јарболите пред собраниската зграда, заедно со знамето на Северна Македонија. Во текот на подготовките за седницата во петокот имаше и проба за знамето на НАТО пред парламентот.
Северна Македонија, всушност, нема последна да го ратификува својот влез како 30. членка во НАТО, како што е вообичаената процедура на организацијата. Поради тоа што парламентот треба да се распушти најдовна до 16 февруари, законот „за ратификација на Северноатлантскиот договор“ (како што гласи точката на дневен ред на 133. собраниска седница) ќе се донесе со клаузула за одложено дејство. Поточно, тој ќе биде депoниран во Вашингтон откако и Шпанија ќе биде „запишана“ како последната земја членка на НАТО која ќе го ратификува Протоколот за нашата држава.
Во однос на очекувањата за шпанската ратификација, претседателот Пендаровски пред една недела за време на посетата на Полска изјави дека очекува тоа да се случи во март.
„Ако сè оди според планот, кога станува збор за политичките текови, околу 10 март би требало тој процес да биде заокружен. Ќе останат само неколку технички детали кои треба да ги заврши Собранието во Скопје“,
рече Пендаровски.