Прогнозата на ОПЕК е во спротивност со онаа на Меѓународната агенција за енергија, која денеска ја намали прогнозата за побарувачка за втората половина од годината поради ширењето на делта-сојот
Организацијата на земјите извознички на нафта (ОПЕК) денеска потврди дека очекува силно закрепнување на побарувачката на нафта оваа година и покрај ширењето на делта-сојот на коронавирусот, но сепак признава дека темпото на заздравување по пандемијата ќе биде диктирано од ковид-19.
Се очекува побарувачката да порасне за 5,95 милиони барели дневно оваа година, или 6,6 проценти во споредба со пандемиската 2020 година, проценува нафтениот картел во месечниот извештај, потврдувајќи ја јулската прогноза. Во 2022 година потрошувачката на горива ќе порасне за 3,28 милиони барели дневно, проценува ОПЕК, исто така потврдувајќи ги прогнозите од минатиот месец.
Од ОПЕК нагласуваат дека светската економија сѐ уште закрепнува и дека сепак постојат голем број предизвици што многу лесно би можеле да го задушат тој импулс.
„Треба да се посвети посебно внимание на настаните поврзани со ковид-19“,
нагласуваат оттаму.
Нивната прогноза е во спротивност со онаа на Меѓународната агенција за енергија (ИЕА), која денеска ја намали прогнозата за побарувачка за втората половина од годината поради ширењето на делта-сојот на коронавирусот, пресметувајќи дека ќе биде пониска за половина милион барели дневно од проценките во јули.
Светската економија годинава ќе порасне, според проценките на ОПЕК, за 5,6 проценти, за 0,1 процентен поен повеќе од претходно очекуваното, под претпоставка дека владите ќе успеат да ги сопрат ефектите од пандемијата и со високо ниво на неизвесност.
Прогнозата за раст за 2022 година исто така беше зголемена за 0,1 процентен поен, на 4,2 проценти.