На Халкидики, веројатно поради удари на гром предизвикани од невремето, вчера избија пет пожари во поширокиот регион на Касандра и Ситонија, активен е само шумскиот пожар во Фурка, а на островот Евија дождот во текот на ноќта им ја олесни работата на пожарникарите
На неколку локации на Халкидики доцна синоќа избувнаа пожари, веројатно, предизвикани од громови, но не претставуваат опасност, додека пак значително е подобрена ситуацијата на грчкиот остров Евија и на Пелопонез, јави дописничката на МИА од Атина.
На Халкидики, веројатно поради удари на гром предизвикани од невремето, вчера избија пет пожари во поширокиот регион на Касандра и Ситонија, а активен е само шумскиот пожар во Фурка, каде што интервенираат 76 пожарникари со четири пешадиски тимови, со 29 возила и по еден авион и хеликоптер.
За конкретниот пожар на Твитер објави и заменик-претседателот на Европската комисија Маргаритис Схинас, кој напиша дека е избегнато најлошото со итната мобилизација на пожарникарите, цивилната заштита и волонтерите.
Дождот во текот на ноќта помогна и им ја олесни работата на пожарникарите во северниот дел на Евија, кои од 3 август се обидуваат да ги стават под контрола огнените јазици.
И понатаму интервенираат голем број пожарникари, вкупно 858, како од Грција така и од Србија, Романија, Полска, Словачка, Украина и Молдавија, а од воздух, пожарот се гаси со четири хеликоптери и три авиони од кои два се руските „ил-76“ и „бериев-200“.
Со мали жаришта, активен е и пожарот во западниот дел на Пелопонез, каде што интервенираат 678 пожарникари со 30 пешадиски тима и 218 возила, а во справувањето со огнената стихија, помагаат и противпожарните сили од Чешка, Велика Британија, Франција, Германија и Австрија.
Од воздух, пожарот се гаси со три авиони и два хеликоптера.
За катастрофалните пожари што мината седмица ја зафатија Грција и предизвикаа материјална штета, грчкиот премиер Кирјакос Мицотакис денеска ќе одржи прес конференција.