Порталот СДК.МК објави дека младоженци од Тетово направиле свадба, иако и тие и целото семејство биле позитивни на брзите ковид тесови.
„Зетот и невестата дошле да примат инфузии за да се освежат пред свадба. Од дома се напиле парацетамол и не му пријавиле на докторот дека имаат температура. Целата свадба си ја истерале со сите салтанати. Дома направиле брзи ковид тестови, кои покажале дека сите во семејството се позитивни, ама не им поверувале на тестовите дека се точни, бидејќи самите си ги купиле во аптека. ПЦР тест не направиле. И сето ова како да не било доволно, па братот на младоженецот со семејството, каде дел биле позитивни, после свадба веднаш заминале на одмор во хотел во Албанија. За ова немаше да се дознае ако зетот да не заврши на Инфективното одделение со пневмонија. Сега следните од семејството се чекаат за хоспитализација“, ни потврди д-р Ефкоски.
изјави тетовскиот доктор Илчо Ефкоски.
Иако за овој случај порталот СДК.МК побарал потврда и од Инфективното одделение во Тетовската болница, но, од таму ниту го негирале ниту го потврдиле. Нивниот одговор е дека најголемиот број од хоспитализираните на нивното одделение се заразиле на свадбите.
Крајно лошата епидемиолошка состојба ја потврдуваат и од Ковид-центарот во Тетово.
„Секој ден имаме нови приеми на заразени. Денеска имаме 47 хоспитализирани пациенти, а во последните 24 часови имаме почината 31-годишна пациентка, која била со тешка пневмонија. Расте и бројот на амбулантските прегледи. Вчера имаше 67 пациенти, што е знак дека состојбата се влошува. Сепак, нема место за паника. Еве сега добивме потврда од Министерот дека голем број од пациентите во Тетово ќе се префрлат во Инфективната клиника во Скопје што ќе ни ја олесни работата и нема потреба повторно да правиме реорганизација на одделенијата“,
вели д-р Гзим Нуредини, раководител на ковид-центарот во Тетово.
Тој за СДК.МК вели дека од 47-те хоспитализирани пациенти, 6 се вакцинирани со една доза вакцина, додека 5 пациенти се вакцинирани со две дози. Сепак, станува збор за пациенти кои имаат и други потешки болести. 40 пациенти се на кислородна поддршка.