Изминатото деноноќие во активностите за гаснење и превенирање на пожарите на територијата на државата беа ангажирани околу 450 полициски службеници, 165 мото-патроли и 148 возила, информира Министерството за внатрешни работи.
„Во текот на посочениот период, во непосредна близина на пожарот кај месноста „Стара депонија“ во Штип бил затекнат С.Г. (57) од Штип со патничко возило „опел астра“, во кое при контрола се пронајдени изгорени пружини за кои појаснил дека ги палел за да ги продаде како отпадно железо. Известен е Јавен обвинител, а по комплетирање на материјалот ќе следи соодветен поднесок“,
соопшти полицијата.
МВР информира и за затекнати граѓани како се движат во шумски појас.
„На 05.08.2021 во 20.10 часот на репетитор Водно од страна на полициска патрола се затекнати три лица кои се движат во шумски појас и тие биле задржани во полициска станица, по што против нив е поднесен соодветен поднесок“,
информира МВР.
Министерството апелира строго да се почитува забраната за движење во шумските предели, граѓаните максимално да се воздржат од палење огнови, отпадоци, меѓи и стрништа на нивите, да не се фрлаат неизгаснати догорчиња и да не оставаат стаклени шишиња или други предмети кои подолго време изложени на сонце можат да предизвикаат пожар. Неопходна е максимална будност и целосно одговорно однесување на секој поединец, додаваат од МВР.