Од Владата велат дека на денешниот состанок биле разгледувани и две други можности. Една е за проширување на листата на дијагнози за кои лекарите може да препишат употреба на канабис, за што се најавува дека во наредниот период ќе се дефинираат и конечни решенија. Другата, пак, е можноста да се направи декриминализација на канабисот сега кога во тек е дискусија за измени на Кривичниот законик
Гостинка од Канада денеска присуствувала на состанокот во Владата што го одржала работната група за канабис и го разгледала канадското искуство за медицинската и личната употреба на канабисот.
Станува збор за Стефани Вилмот, која е консултант за правни прашања и добри производни практики, познати како GMP стандарди (Good Manufacturing Practice) и процеси за примена на лиценци. Таа присуствувала на состанокот на покана од Здружението на производители на медицински канабис и го споделила искуството и информациите за начинот на кој во Канада е легализирана марихуаната за медицинска и за лична употреба.
„Беа објаснети повеќе аспекти кои ги опфаќаат прописите за здраво и безбедно одгледување на канабисот, за контрола на квалитетот во сите аспекти на производството, и тоа за: неопходноста од научно истражување за примена на канабисот како лек за специфични болести, важноста на правилното инспекциско работење за да се обезбеди дека нелегалниот канабис не влегува во медицинскиот пазар и пазарот за лична употреба, вклучително и целосни контролни механизми за следење на одгледувањето и производството на канабис, заштитата на малолетници, и даночните придобивки од легализацијата на канабисот“,
соопштија од Владата.
Според информациите од Владата, покрај канадското искуство, ќе се разгледуваат и моделите за статусот што го има канабисот и во други земји. Како што соопштија, во тек е изработката на компаративна анализа за употребата на канабисот во 10 држави: Португалија, Холандија, Чешка, Шпанија, Канада, Колорадо (САД), Калифорнија (САД), Израел, Хрватска и Албанија.
Во владиното соопштение објавено вечерва се наведува на денешниот состанок биле разгледувани и две други можности. Една е за проширување на листата на дијагнози за кои лекарите може да препишат употреба на канабис, за што се најавува дека во наредниот период ќе се дефинираат и конечни решенија. Другата, пак, е можноста да се направи декриминализација на канабисот сега кога во тек е дискусија за измени на Кривичниот законик.
Ова е трет состанок на работната група во која учествуваат претставници од: Кабинетот на премиерот; Министерството за здравство; Министерството за правда; Министерството за внатрешни работи; Здружението на токсиколози; Психијатриската асоцијација; Факултетското студентско собрание при Фармацевтски факултет; Хелсиншкиот комитет за човекови права; ХОПС – Опции за здрав живот Скопје; Коалицијата Маргини; Здружението „Операција Ослободување“; Здружението за канабис и зелени политики „Билка“; НВО коалиција Канабис институт Пелагонија; Здружението на производителите на медицински канабис; Иновативната фармацевтска индустрија; и Факултетот за земјоделски науки и храна при УКИМ.