Основното јавно обвинителство Скопје денеска соопшти дека е отфрлена кривичната пријава поднесена против вкупно пет лица за кривично дело – злоупотреба на службената положба и овластување од член 353 од Кривичниот законик во врска со постапка за отуѓување на градежно земјиште во Општина Центар.
Се работи за случајот со изградбата на барокната катна гаража на 8 ката кај „Автомакедонија“ во центарот на Скопје, која беше предвидена како дел од проектот на Владата на Никола Груевски „Скопје 2014“.
Кривични пријави уште во 2015 година беа поднесени против поранешниот министер за транспорт и врски Миле Јанакиески, поранешниот градоначалник на Центар, Владимир Тодоровиќ, против вработен во Министерството за транспорт и врски и државен правобранител, а подоцна пријавата беше проширена против уште едно лице – поранешниот министер за транспорт и врски Владо Мисајловски.
Тие се однесуваа на евентуални неправилности во поглед на неисполнување на договорните обврски од склучен договор меѓу Министерството за транспорт и врски како оттуѓувач на градежно земјиште во државна сопственост со фирмата „Никофон“ ДООЕЛ по пат на електронско јавно наддавање.
Обвинителството во постапката испитало претставници на Општина Центар, претставник на Министерството за транспорт и врски, претставник на Државното правобранителство, претставник на банката од која бил земен кредит со залог на земјиштето, нотарот пред кој бил солемнизиран договорот, како и управителот на правното лице – купувач на земјишната парцела, кои биле задолжени да достават соодветна документација за поткрепа на изнесеното пред јавниот обвинител со цел да се утврди хронологијата и да се проучи постапувањето на пријавените во настанот.
„Врз основа на сите прибавени докази и утврдени факти и околности, надлежниот јавен обвинител оцени дека во дејствијата на пријавените не се содржани битните елементи на пријавеното кривично дело ниту, пак, на друго кривично дело за кое гонењето се презема по службена должност“, соопштија од ОЈО.
Центарци против „Никофон“
Општина Центар во времето кога градоначалник беше Владимир Тодоровиќ со измена на Деталниот урбанистички план за овој дел, нацрта маркичка за барокна катна гаража со деловен простор, со приземје и 8 ката. Градежната дозвола „Никофон“ ја доби на 31 март 2014 година, а стана правосилна на 16 јуни 2014. Но бидејќи тој простор е државно земјиште, неколку години пред да биде вцртана маркичка за катна гаража, бил даден во владение на ЈП „Паркинзи Општина Центар“ заради формирање организирано паркирање. Со цел да се спречи изградба на зградата, „Паркинзи Центар“ не го отстапува просторот повикувајќи се на одлуката за владение, по што инвеститорот поднел тужба и почнал судскиот процес. „Никофон“ добива судска пресуда дека тој е сопственик на парцелата и со извршно решение во ноември лани го презеде паркингот.
Градоначалникот на Општина Центар, Саша Богдановиќ, тогаш го повика обвинителството да постапи по кривичните пријави и да донесе времена мерка за какви било активности.
Граѓанска постапка за неисполнетите услови
Општина Центар и граѓаните поднесоа кривични пријави и за начинот на формирање на цената. Во кривичните пријави се спори почетната цена бидејќи според Правилникот за утврдување на висината на цената на градежно земјиште при компатибилна намена таа треба да е 70 отсто од цената за изградба на катна гаража која е 6.000 денари и 30 отсто од цената за деловен простор која е 5.000 денари.
Обвинителството при постапката утврдило дека почетната цена на јавното наддавање била заснована врз тогаш важечките прописи, односно врз важечката уредба за висината на цената на градежното земјиште во сопственост на РМ и висината на посебните трошоци за спроведување на постапката, односно дека сите законски и подзаконски предуслови за електронското јавно наддавање биле исполнети. Неизбраниот понудувач, пак, не презел никакви дејствија за поништување на јавното наддавање доколку сметал дека постоеле причини за тоа, ниту побарал управна заштита или инспекциска проверка на спроведената постапка.
„Исто така, јавниот обвинител предвид го имаше и фактот дека од склучувањето на договорот до денес на раководната позиција во Министерството за транспорт и врски се смениле повеќе министри, а во непреземањето на дејствија за едностран раскин на договорот не може да се извлече заклучок дека постојат елементи на кривично дело кај кое било од лицата кои ја извршувале таа функција. Имено, дали се настапени условите за еднострано раскинување на договорот зависи од договорната волја на отуѓувачот на земјиштето, како и од основаноста и правниот интерес за преземање на такви дејствија во случај на спор околу неисполнетост на договорните обврски по вина на купувачот“, велат од ОЈО.
Во однос на неисполнување на договорниот рок од страна на купувачот – фирмата „Никофон“ ДООЕЛ да прибави одобрение за градба на предметниот објект во рок од 9 месеци од извршената солемнизација, ОЈО укажува дека единствено во граѓанска постапка може да се утврдува дали рокот не бил испочитуван по вина на купувачот.