Францускиот амбасадор Кристијан Тимоние денеска изјави дека процесот на реформа на методологијата на преговарање и пристапните преговори можат да одат паралелно. Со ова тој како да ја омекна досегашната реторика дека прво е потребна реформа на процесот на преговарање, а потоа би се отвориле преговори со земјите кандидати за членство.
„Наш впечаток е дека веќе е направена сериозна работа врз база на нашите предлози, но и на другите предлози. Од наша страна постои другото прашање, а тоа е за реформата на функционирањето на ЕУ, затоа што ќе нема смисла да ве прифатиме во друштво во кое ќе нема ред. Од таа гледна точка ќе кажам дека процесите можат да се водат паралелно затоа што патот што е пред вас не е краток, но сепак тоа е и пат на наши внатрешни реформи во Унијата, кој исто така не е краток, но ќе се обединат најверојатно и мислам дека ќе треба да работиме во оваа насока. Мислам дека во овој момент ние го правиме она што пребрзо беше оквалификувано како историска грешка, туку ќе кажам историска можност можеби за да тргнеме од добра основа во таа европска изградба која отсекогаш добро функционирала дури и во сукцесивни кризи. Искрено се надевам дека во наредните месеци ќе ги видиме и конкретните плодови од тоа, да не лиферуваме со конкретни датуми, но моите надежи се дека датумот е сè поблиску“,
рече Тимоние во обраќањето на тркалезната маса „Патот кон НАТО и ЕУ – предизвици и перспективи“ организирана од Советот на амбасадорите во соработка со кабинетот на претседателот на државата Стево Пендаровски.
Тој ја повтори француската позиција дека ревизија на методологијата нема за цел да ја спречи земјата да влезе во ЕУ и оти судбината на нашата земја е европска. Предлозите дадени од Париз за новата методологија, како што рече, се директно поврзани со населението во ЕУ, кое во голем дел е заморено од процесот, особено во Франција, но и кај луѓето од нашиот регион кои, како што вели, забележале дека целта е сè подалечна.
Францускиот амбасадор зборуваше и за членството во НАТО, при што рече дека тоа е веќе завршена работа бидејќи знамето на Северна Македонија е веќе поставено пред седиштето на Алијансата, што ќе биде знак за стабилизирање на регионот.