Согласно информациите добиени од нашето Дипломатко-конзуларно претставништво во НР Кина, Министерството за надворешни работи (МНР) информира дека до овој момент во Амбасадата не е пријавен ниту еден случај на наш државјанин заболен со коронавирусот. Исто така, нема пријавени наши државјани кои се наоѓаат во пошироката зона со рестриктивни мерки за движење на кои им е потребна помош.
Како што информира МНР, во Кина легално престојуваат околу 100 наши државјани, а нашето ДКП е во постојан контакт со нив.
Граѓаните за подетални информации околу развојот на состојбите можат да се обратат во нашата Амбасада во Пекинг на дежурниот телефонски број +86 185 1351 2812 или е-маил, beijing@mfa.gov.mk.
Евакуација на европските граѓани
Велика Британија, Германија и Шпанија денеска најавија дека ќе помогнат на своите граѓани да го напуштат кинескиот град Вухан, од каде почна заразата со коронавирусот, од кој досега починаа 80 луѓе. Претходно, Франција, САД и Јапонија соопштија дека се подготвуваат за евакуација на своите државјани.
Делегацијата на ЕУ денеска во Пекинг ќе одржи итен состанок за да ја координира евакуацијата на европските граѓани, кои се наоѓаат во Кина за да се ограничи заразата од коронавирусот.
Во меѓувреме, кинеското Министерство за финансии соопшти дека ќе издвои 8,74 милијарди долари за да го спречи ширењето на коронавирусот.
Прв спртен случај во пекинг, над 2.700 заразени
Властите во Пекинг денеска потврдија дека во кинескиот главен град е регистриран првиот смртен случај од новиот смртоносен вирус што брзо се шири низ целата земја.
Жртвата е 50-годишен маж, кој го посетил централниот град Вухан, епицентар на епидемијата, на 8 јануари и развил треска седум дена откако се вратил во Пекинг, соопшти градската здравствена комисија.
Од коронавурусот досега починаа најмалку 80 лица, а само во Кина се заразени 2.744 лица. Вирусот продолжи да се шири во светот, па надвор од границите на Кина се регистрирани 50 заразени случаи, од кои петмина во САД.