Во Собранието утре треба да почне јавна расправа за законот за јавно обвинителство. Претседателот на Комисијата за политички системи и односи меѓу заедниците, пратеникот Александар Кирацовски, за утре во 14 часот закажа расправа насловена „Јавното обвинителство како ефикасен орган во борба против корупцијата“.
На јавната расправа се очекува да присуствуваат републичкиот обвинител Љубомир Јовески, шефицата на обвинителството за гонење организиран криминал и корупција Вилма Русковска, обвинителките Фатиме Фетаи и Ленче Ристоска, како и универзитетски професори, адвокати, претставници на граѓанскиот сектор.
Јавната расправа следува откако во петокот министерката за правда Рената Дескоска имаше средба зад затворени врати со претставници на сите пратенички групи. Тогаш ВМРО-ДПМНЕ ја напушти средбата бидејќи бараше и Јовески да биде присутен на неа зашто во изјава за медиумите во декември изнел остри критики за законот. Второ барање на опозицијата беше да се организира јавна расправа.
Јовески веројатно ќе присуствува на расправата бидејќи, како што и самиот најави во изјава за „360 степени“, ќе учествува ако биде поканет. Тој ја објаснуваше и својата изјава поради која опозицијата бараше негово присуство, при што потенцираше дека изнесените критики биле за вградување на политички решенија во изборот на обвинител кој ќе раководи со едно од обвинителствата.
„Веќе се изјаснив дека ако се отвори стручна расправа и ако бидам повикан, ќе учествувам на расправата, а во политичките договарања за донесување на законот не му е местото на јавниот обвинител на Република Северна Македонија. Тогаш дадената изјава се однесува на интенцијата за вградување политички решенија во текстот на законот, особено во постапката за избор на обвинител кој ќе раководи со едно од обвинителствата. Бев член на работната група што го изработи текстот на законот, кој беше разгледан и во обвинителството и сметам дека тој обезбедува професионално и самостојно обвинителство“,
рече Јовески.
Покрај утрешната јавна расправа, се очекува во текот на оваа недела министерката Рената Дескоска уште еднаш да седне на маса со претставниците на пратеничките групи со цел сите да се произнесат за нивните забелешки.