Канадското Министерство за здравство денеска објави дека ќе дозволи употреба на вакцината на „Фајзер/Бионтек“ за деца на возраст од 12 години, со што стана првата земја што одобри употреба на вакцина за таа возрасна група
Европската агенција за лекови (ЕМА) започна со проценка на барањето од германската фармацевтска компанија „Бионтек“ и американската „Фајзер“ за одобрување на употребата на вакцини против коронавирус кај деца на возраст од 12 до 15 години
Производителот неодамна ги објави резултатите од студијата направена на 2 000 адолесценти, која покажа дека вакцината кај деца е 100% ефикасна и безбедна
Европската агенција за лекови (ЕМА) започна со проценка на барањето од германската фармацевтска компанија „Бионтек“ и американската „Фајзер“ за одобрување на употребата на вакцини против коронавирус кај деца на возраст од 12 до 15 години. Одлуката се очекува да биде позната во јуни, но некои земји веќе започнаа со вакцинирање.
Повеќето вакцини против коронавирус одобрени од властите ширум светот се наменети за возрасни, но здравствените власти веруваат дека вакцинирањето деца од сите возрасти ќе биде клучно за запирање на пандемијата. Засега, само вакцината „Фајзер/Бионтек“ е одобрена за употреба кај лица над 16 години.
Производителот неодамна ги објави резултатите од студијата направена на 2 000 адолесценти, која покажа дека вакцината кај деца е 100% ефикасна и безбедна. Децата кои учествуваа во тестирањето ќе бидат надгледувани во следните две години за да се утврди долготрајноста н дејството и безбедноста.
Во САД, „Фајзер/Бионтек“ аплицираше на почетокот на април за одобрување на нивната итна вакцина за деца на возраст од 12 до 15 години. Барањето за одобрување се заснова на податоци од клинички испитувања во фазата три извршени на таа возрасна група, кои покажуваат 100% ефикасност во спречување на болеста.
Реакциите на вакцината, исто така, се добри и несаканите ефекти се генерално во согласност со оние забележани кај лица на возраст од 16 до 25 години, велат од „Фајзер/Бионтек“.
За деца од пет до 12 години, резултатите од клиничките испитувања се очекуваат во јули. Резултатите од студијата за уште помали деца може да бидат дури во септември.
„Модерна“ започна и со тестирање на вакцини за деца од 12 години и повеќе, но истражувањето не се очекува да заврши пред следната година, додека Универзитетот Оксфорд на почетокот на март најави тестирање на вакцини „Астра Зенека“ за деца на возраст од шест години.
Канада
Канадското Министерство за здравство денеска објави дека ќе дозволи употреба на вакцината на „Фајзер/Бионтек“ за деца на возраст од 12 години, со што стана првата земја што одобри употреба на вакцина за таа возрасна група.
Министерството заклучи дека вакцината е „безбедна и ефикасна“ во спречување на коронавирус кај деца на возраст од 12 до 15 години.
Одлуката е донесена по „ригорозен и независен преглед на научни докази“.
Канадските власти претходно ја одобрија вакцината од 16-годишна возраст.
Израел
Вакцинацијата на тинејџери во Израел започна на 23 јануари.
Израел започна успешна кампања за имунизација со вакцинирање на здравствените работници, потоа постарите лица и оние кои припаѓаат на ризични групи. Веќе на крајот на јануари, една четвртина од 9,3 милиони луѓе во земјата беа имунизирани. Потоа беше одлучено дека кампањата за вакцинација треба да се прошири на средношколци од 11 и 12 одделение. За да можат да се вакцинираат тинејџерите, тие мора да имаат согласност од родителите.
„До март, Израел вакцинираше околу 600 деца на возраст од 12 до 16 години, кои спаѓаат во ризичната група, со вакцината ‘Фајзер/Бионтек’ и не се пријавени значителни несакани ефекти“,
рече израелскиот лекар Боаз Лев, член на советодавниот тим во Министерството за здравство.
Лев најави дека Министерството ќе започне кампања за безбедност на вакцините доколку се одобри имунизација за помали деца.
Њујорк
Жителите на Њујорк постари од 16 години можат да аплицираат за вакцинација против ковид-19 од почетокот на април. Тинејџерите на возраст меѓу 16 и 17 години можат да примат вакцина „Фајзер/Бионтек“, бидејќи е единствената што има дозвола за употреба кај лица помлади од 18 години. Потребна им е родителска согласност за вакцинација, освен ако не се веќе во брак или не се родители.
Досега не е одобрена вакцина за деца под 16-годишна возраст во САД, но Агенцијата за храна и лекови (ФДА) треба да одобри имунизација на деца од 12 до 15 години со вакцината „Фајзер“ на почетокот на следната недела.
Вакцинацијата на адолесцентите е планирана и на државно ниво. Претседателот Џо Бајден објави дека доколку вакцината против ковид 19 биде одобрена за оваа возрасна група, таа „ќе ги охрабри државите да дадат барем една доза од вакцината на адолесцентите до 4 јули“ и ќе обезбеди доставување на вакцините на педијатри и други здравствени професионалци. Целта на оваа кампања, како што рече Бајден, е голем број на деца на возраст од 12 до 15 години да бидат целосно вакцинирани до почетокот на следната учебна година.
Младите во Соединетите држави го сочинуваат мнозинството нови случаи на заразени со коронавирус, додека повеќето возрасни граѓани барем делумно се вакцинираат.
Како е во нашето соседство?
Информацијата дека вакцинацијата на деца на возраст од 16 и 17 години, како и на бремени жени и доилки ќе се препорачува во иднина, предизвика големо внимание во јавноста во Србија, пренесува Блиц.
Документот од Експертскиот комитет за имунизација на состанок одржан на 26 април, со кој практично се одобрува вакцинацијата на овие групи со вакцината „Фајзер“, стигна до јавноста, но сè уште не и до „изведувачите“ на терен.
Според Законот за здравствена заштита, од 1 јануари 2012 година, дете кое наполнило 15 години и е способно за расудување и независно донесување одлуки, има право да следи лична медицинска документација и право на доверливост на податоците во неговата здравствена книшка.
Во документот од 26 април се наведува дека пред вакцинацијата, и бремените жени и тинејџерите прво треба да се консултираат со својот лекар, односно со гинекологот кој ја води бременоста. Поради тоа засега е нејасно дали тоа значи дека е неопходна потврда од избраниот лекар за да се вакцинираат, пренесува Блиц.