Шефицата на Обвинителството за гонење организиран криминал изјави дека тоа што објави „Ла Верита” се извадоци од истрага на обвинителството, но кога ќе се видат целите разговори, дело нема
Италијанскиот весник „Ла Верита“ денеска на интернет-страницата продолжува со објавување делови од кривична пријава за која тврди дека била поднесена против Зоран Заев во 2014 година за купување гласови на изборите, а која останала до ден денес во фиока.
Во денешниот видео-прилог со наслов „Заев ги плаќал гласовите по 10 евра“ авторот Ларис Гајсер објавува транскрипти од разговори набавени наводно со ПИ мерки и во кои се споменуваат имињата на Заев како градоначалник на Струмица, неговиот брат Вице, Марјан Даскаловски, сопственик на менувачница „Даскал“, избран за пратеник во Собранието и претседател на локалниот огранок на СДСМ и на директорот на ЈП Комуналец-Струмица, Зоран Георгиев, а како што тврди авторот, се однесуваат на уцени, поткуп, закани, отпуштања од работа, исклучувања од водоводна и електрична мрежа, рекет на стопанственици, извршители, нотари како притисок за добивање гласови.
„Постоечката документација во обвинителството за борба против организиран криминал во Скопје поседува извадоци од снимени разговори од кои може да се заклучи дека екс-премиерот Зоран Заев заедно со неговиот брат Вице Заев, зборувајќи отворено на телефон, управуваат со развиена мрежа за купување гласови базирана на пари и уцени, со цел добивање гласови, посебно од Ромите што живеат во Струмица. Анализираните документи опишуваат сценарио во кое тогашниот лидер на СДСМ и градоначалник на Струмица, осомничен за изборни измами, се служел со нерегуларни средства за да биде избран во Собранието, за потоа да стане премиер. Гласачите кои одлучиле да соработуваат биле плаќани, за секој глас поединечно, од 10 до 25 евра, во две менувачници раководени – една од Вице Заев и една од негов колега“,
објавува „Ла Верита“.
За директорот на ЈП Комуналец во Струмица, Зоран Георгиев, во прилогот на „Ла Верита“ се вели дека „служејќи се со службените ресурси што му биле на располагање, се заканувал или ги казнувал тие што се двоумеле дали да соработуваат при гласањето, а секако ги наградувал оние другите“. Неговото влијание се доведува во релација со неговата сопруга судијката од судот во Струмица, Лорета Георгиева, која неодамна стана член на Судскиот совет.
„Ла Верита“ понатаму тврди дека постојат аудио-снимки меѓу Заев и неговиот брат и други соговорници, во кои Заев е информиран за гласања против СДСМ, при што тој, според транскриптите, побарал казна „веднаш да се избрка од работа цела фамилија, една негувателка, еден возач, како и да се исклучат од струја одредени семејства преку локалната компанија за електрична енергија, во сопственост на австриската ЕВН“.
Русковска: Случајот е затворен поради немање докази
Обвинителката Вилма Русковска вчера потврди дека објавените документи се дел од истрага која се спроведувала во 2014 и 2015 година. На распит биле повикани Зоран Заев и неговиот брат, но случајот во 2018 г. е затворен, бидејќи немало докази дека осомничените сториле кривично дело.
„Тоа што објави ,Ла Верита’ се извадоци од истрага на обвинителството. Кога ќе се видат целите разговори, дело нема“,
изјави вчера Русковска за медиумите.
Владејачкиот СДСМ денеска во реакцијата на објавените информации на „Ла Верита“ посочува дека се работи за фабрикувани случаи од времето на режимот и заробената држава кога Зоран Заев беше главна мета на измислици и монтирани случаи.
„Изборите во 2014 година се симбол на изборните кражби на ВМРО-ДПМНЕ и почеток на политичката криза која заврши со пад на Груевски. Од објавените материјали јавноста јасно виде како ВМРО-ДПМНЕ правеле изборни кражби, преку штанцање лични карти, кражба на изборни материјали, гласање на починати лица. Ова се само дел од изборните нерегуларности кои ги правеше ВМРО-ДПМНЕ во 2014 г., а за кои јавноста слушна преку ,Вистината за Македонија’. Денес ВМРО-ДПМНЕ преку медиуми блиски до нив, со силни конекции со кадрите на ВМРО-ДПМНЕ како Андреј Лепавцов и Ѓорге Иванов, очајно се обидува да конструира непостоечки случаи“,
пишува во партиското соопштение.
Заев вчера коментирајќи ги наводите во весникот изјави дека целиот случај имал политичка позадина, бидејќи СДСМ не ги признала тогашните избори.
„Ако имале какви било докази, верувајте 2014 година со целата сила на ВМРО-ДПМНЕ, Заев ќе го осуделе. Значи, немаа никакви докази, дури не отворија ни обвинителен акт поради тоа што немаше. Беше една фама што ја создаваа се со цел да се оцрни тогаш лидерот на опозицијата Заев, а никако не можеа ниту да заокружат било што, било каков наратив да поднесат обвинение“,
изјави вчера Заев.
Во времето за кое „Ла Верита“ наведува дека е поднесена кривичната пријава против Заев, со обвинителството за организиран криминал раководи Јован Илиевски, баџанак на Мијалков, кој во октомври 2016 година е избран за судија во Европскиот суд за човекови права. Со државното јавно обвинителство во тоа време, пак, раководи Марко Зврлевски, кој беше разрешен во август 2017 година.
За тоа кои се „Ла Верита“ и авторот Ларис Гајсер, детали прочитајте од анализата на „360 степени“ ТУКА.