Фабриката за хартија „Пејпер мил“ во Кочани ќе стартува со производството само доколку ги исполни условите за работа, порача денеска од Штип министерот за животна средина и просторно планирање Насер Нуредини.
Последниот инспекциски надзор пред два месеца од Државниот инспекторат за животна средина покажа дека гасовите што излегуваат од фабричкиот оџак на кочански „Пејпер мил“ ги надминуваат граничните вредности на прашина и јаглероден моноксид.
Поради тоа, Државниот инспекторат за животна средина ѝ наложи на кочанската фабрика за хартија да работи само на плин и да престане да го користи котелот на пелети, како и да се постави нов филтер и загадувањето да се намали под граничните вредности. Раководството на бугарската фабрика за хартија кон средината на јануари оваа година одлучи да го прекине производството, а ќе почне со работа кога ќе се постави филтерот.
Прашан за реакциите на жителите на Кочани и Пробиштип за изградба на мини хидроцентрали на реките Мала Река и Шталковица, Нуредини со одговор дека ги слушаат реакциите на граѓаните.
„Ние како Влада треба да ги почитуваме договорите, кои се потпишани во минатото. Градоначалникот треба да седне заедно со граѓаните и да ги разгледа уште еднаш овие прашања и да ни пратат ново мислење. Доколку има поинакво мислење, тогаш ќе седнеме и ние ќе го смениме и нашето решение“,
вели Нуредини.
Основното јавно обвинителство од Кочани покрена постапка за хидроцентралата на Мала Река. Градоначалникот на Општина Кочани, Николчо Илијев, вчера истакна дека целата документација што се бара од нив ќе биде доставена до обвинителството и смета дека иницијативата на невладините организации за референдум е легитимна. Локалната власт и граѓаните за изградбата на оваа мини хидроцентрала дознаа лани во септември, откако инвеститорот почна со сечење на дрвјата на местото каде што ќе биде овој објект.