Според директорот на ДЗС, тука има и злоупотреба на лични податоци, затоа што тој што се обидува да упадне користи туѓ матичен број, односно ако упаден со својот матичен број може многу лесно да биде лоциран и да сноси одговорност
Тврдењето дека многу граѓани се попишале преку користење на VPN апликација е нереално, бидејќи тоа се регистрира и тие податоци не одат во базата каде што се складираат податоците од попишаните лица од странство, туку се идентификува и се чува како доказ за упаѓање во системот, објасни директорот на Државниот завод за статистика Апостол Симовски во разговор за Сител.
Со самото влегување на веб страницата за самопопишување, нагласи Симовски, лицата се предупредени и се сложуваат со условите, поради што и сносат одговорност.
Посочи дека тука има и злоупотреба на лични податоци, затоа што тој што се обидува да упадне користи туѓ матичен број, односно ако упаден со својот матичен број може многу лесно да се лоцира и да сноси одговорност.
Последниот податок, според Симовски, е дека денеска во 10 часот има 11 149 вклучувања во базата, но тоа не значи пополнета апликација, бидејќи во овој момент никој нема овластување да влегува во базата за тоа да го провери.
Во однос на можноста пописот на сите граѓани да биде преку интернет апликацијата, Симовски, вели дека во таков случај пописната операција би била многу едноставна и не би чинела ниту денар, меѓутоа ние како држава се уште немаме адресен регистар.
„Во пописот појдовната основа е адресата на живеење, односно живеалиштето и од тука тргнуваат сите процеси. Ова е главниот проблем, што немаме функционален адресен регистар. Агенцијата за катастар работи на воспоставување на ваков регистар и има доста напредок, меѓутоа тоа не е имплементирано на терен“,
изјави Симовски.
Во државата, нагласи тој, барем една третина од населението не живее на адресата што ја пишува во личната карта.
Во однос на лицата кои ќе се самопопишат преку апликацијата, а потоа ќе бидат попишани и од нивните семејства како лица во странство, Симовски рече дека е можно да се случи двојно попишување, но во тој случај за тоа лице ќе бидат земени податоците од самопопишувањето.
Симовски рече дека апликацијата што ја користат попишувачите на терен не е иста со апликацијата за самопишување преку интернет, и дека станува збор за систем што е работен од друга софтверска компанија, но содржината на прашалниците е сосема идентична.
Симовски, исто така, нагласи дека податоците од пописот не може да се дадат ниту на граѓанинот, ниту на кое било друго лице или институција и дека тие служат само и исклучиво за статистички цели.
Повтори дека пописот е задолжителна обврска за сите граѓани и затоа се носи Закон за попис.