Судскиот совет, на утрешната седница, ќе расправа по „Извештај од Комисија за утврдување на одговорност на судија/претседател на суд“. Според неофицијални, но упатени извори, станува збор за постапката против врховната судијка, Лидија Неделкова, а во споменатиот извештај се препорачува таа да биде разрешена од судиската функцијата.
Зошто?
Постапката против судијката Лидија Неделкова се водеше по претставка од сега веќе разрешениот врховен судија Јово Вангеловски. Според неодамнешна изјава на судијката, претставката не била поврзана со (не)постапување по одреден предмет, туку:
„Се работи за една од повеќето пријави кои поранешниот претседател на Врховниот суд, Јово Вангеловски, ми ги поднесуваше поради нетрпеливост околу еден случај. Таа постапка нема никаква врска со некакви предмети или незаконско постапување, туку негов аспект околу работните односи, користење на работното време, значи нема врска со никаков предмет“,
изјави Лидија Неделкова на 27 јануари 2021 година.
Конкретната претставка и самата има своја историја. Првичната Комисија која работела на неа направила еден извештај, но тој бил вратен на доработка. Но, бидејќи истекол мандатот на еден од членовите во првичната Комисија, на негово место доаѓа друг член на Судскиот совет.
Од кандидат за претседател до разрешување за само неколу дена
Токму смената на Комисијата без да се одлучува по првичниот извештај, беше причината што Лидија Неделкова поднесе кривична пријава против претседателот на Судскиот совет, Киро Здравев, и уште двајца членови. Ги товареше за злоупотреба на службената положба бидејќи, според неа, ја искористиле положбата за да влијаат на постапката што се води против неа по поднесена претставка од Вангеловски. Поточно, пријавените како членови на Судскиот совет не го прифатиле првичниот предлог на комисијата, постапката против Неделкова да се запре, и влијаеле одлуката да се преиначи во предлог за нејзино разрешување, спротивно на закон.
„Членовите на Судскиот совет… наместо да го уважат, како што е досегашната пракса на постапување по ваквите предлози, без да дадат соодветни напатствија, го вратија предметот на доработка и покрај тоа што знаеле дека немаат доволен број гласови за одлука за враќање на предметот, затоа што им биле потребни осум односно седум гласови, согласно одредбите на член 8 и член 60-д од Законот за измени и дополнување на Законот за Судскиот совет на РМ (‘Сл. весник на РМ’ бр. 197 од 29.12.2017) по кој закон се водела постапката, иако за оваа одлука гласале само шест членови од вкупно дванаесет присутни.
Сето ова било сторено од причина што се знаело дека членот на комисијата, судијата Зоран Караџовски, не е веќе член на Судскиот совет поради истекот на мандатот, па бил променет составот на комисијата, со изборот на второ пријавената Г.С.пишува во кривичната пријава на Лидија Неделкова до ОЈО Скопје.
Но, кривичната пријава само за кратко ја одложи постапката против Неделкова пред Судскиот совет, бидејќи на Обвинителството му беа потребни само десетина дена за да ја отфрли пријавата.
Сето ова се случуваше во периодот додека Судскиот совет избираше нов претседател на Врховниот суд, каде меѓу тројцата кандидати беше и Неделкова. Но, во петокот (12 февруари 2021 година), Судскиот совет ја избра Беса Адеми за претседателка на Врховниот суд, со што формално беше „отстранета“ и последната пречка за потенцијално разрешување на Неделкова. По изборот на Адеми, Судскиот совет веднаш го стави на дневен ред предметот против поранешната претседателка на Врховниот суд, Лидија Неделкова.
Филтрација
Во последниот месец и половина беа разрешени две судијки, кои извршната власт ги коментираше во веќе објавената методологија за „филтрација“ на правосудството.
Една недела пред Нова година беше разрешена Весна Кичеец од Охрид, за нејзиното постапување во случајот со убиството на Димитар Матиловски (27).
Во јануари, пак, беше разрешена судијката Татјана Михајлова, поранешната претседателка на Кривичниот суд во Скопје. Причината за нејзиното разрешување беа злоупотреби со АКМИС.
Освен извештајот за Неделкова, пред Судскиот совет утре ќе се најде и точката „Формирање на комисии на известители по поднесените барања за поведување на постапка за утврдување на одговорност на судија/претседател на суд“. За кои судии се претставките засега не е познато.