МВР има посебен акциски план за време на празници, а тоа значи дека секаде и во секој момент ќе има полиција која ќе врши контрола дали се почитуваат мерките, порача денеска министерот за внатрешни работи Оливер Спасовски.
Тој не сакаше да зборува за детали од акцискиот план и рече дека доволно е тоа што граѓаните ќе знаат дека во секој момент ќе има полиција на терен. Секој што ќе ги прекрши мерките и ќе биде дел од собири, најави дека ќе добие кривична.
„Секој кој нема да ги почитува мерките, дали е тоа сопственик на вила за издавање или е граѓанин кој учествува во такви настани ќе бидат поднесени кривични пријави со кривична одговорност, заради тоа што директно го загрозуваат животот и здравјето на граѓаните“,
подвлече Спасовски.
Министерот кажа дека полицијата ќе постапува по пријава или по сознание кое ќе го добие, а ако се утврди дека се случува организиран настан, тогаш се известува јавен обвинител и се постапува врз основа на законот.