Судскиот совет разреши двајца судии од Основниот суд Охрид поради несовесно работење.
Според неофицијалните информации на „360 степени“, разрешена е судијката Весна Кичеец за судскиот процес против српскиот турист кој на новогодишната ноќ во 2016 година го претепа до смрт охриѓанецот Димитар Матилоски во центарот на градот.
Неофицијално, Советот утврдил грешка во работењето на Кичеец поради неитно постапување, со што на обвинетиот Бојан Угреновиќ му истекол притворот и излегол на слобода, по што избега од Македонија. Потоа, српскиот државјанин беше осуден на 16-годишна затворска казна.
Кичеец има право на жалба, но ѝ се забранува да суди.
Од Судскиот совет официјално не потврдуваат за кој судија станува збор, а на нивната веб-страница е објавено кусо образложение.
„Донесена е Одлука со која е разрешен судија од вршење на судиската функција поради нестручно и несовесно вршење на судиската функција и истовремено е донесена Одлука за времено оддалечување на судијата од вршење на судиската функција до правосилно завршување на постапката“,
се вели во соопштението.
Во вториот случај се работи за неодамна пензионираниот судија Трајче Скрчески, за кој вторпат се одлучува по неговата жалба, но Советот одлучил дека судијата работел нестручно и несовесно.