Хрватска од денеска е новиот претседавач со Советот на Европската Унија. Претседателството го презема од Финска, а во јуни ќе ѝ го предаде на Германија.
Овој ден официјален Загреб го смета за историски, имајќи предвид дека државата е последната која влезе во ЕУ во 2013 година, а веќе има сериозна задача пред себе.
Хрватскиот премиер Андреј Пленковиќ веќе во наредните денови ќе биде домаќин и ќе има средби со голем број од челниците на европските институции, јави дописникот на МИА. Веќе на 7 јануари, два дена по вториот круг на претседателски избори, Пленковиќ патува во Париз на средба со францускиот претседател Емануел Макрон. Една од темите на разговор, според најавите, ќе биде и проширувањето кое за време на хрватското претседателство ќе биде висока на агендата. Хрватската влада неколку пати го повтори ставот дека отворањето на преговорите со Северна Македонија и со Албанија е нешто што треба да се случи за време на нивното претседателство.
„360 степени“ веќе објави дека Европската комисија работи на план чија крајна цел е почеток на преговори за членство со С Македонија и со Албанија во март оваа година. Новиот еврокомесар за соседство и проширување, Унгарецот Оливер Вархели, за ова уште на почетокот на декември минатата година ги информираше министрите за надворешни работи на земјите-членки на ЕУ. Тој тогаш изјави дека ќе има можност за исправање на грешката што беше направена во октомври со почнување пристапни преговори со двете земји (С Македонија и Албанија) веќе следната пролет.
Идејата на Вархели, според информациите на „360 степени“, е документот за реформа на методологијата за преговори, во нацрт-верзија, да излезе од Европската комисија кон крајот на јануари, по што комесарот би почнал консултации со земјите членки на ЕУ. Во идеално сценарио, новата методологија и одлуката за почеток на преговори со Скопје и со Тирана би требало да се донесат во март.
Временската рамка за идните чекори би требало да изгледа вака:
- Европската комисија до крајот на јануари изготвува нацрт-методологија за пристапните преговори и почнува консултации со земјите членки на ЕУ;
- Европската комисија во февруари објавува скратен извештај за напредокот во реформите во Северна Македонија и во Албанија;
- Советот на Европската Унија, односно земјите членки, кон крајот на март ја усвојуваат новата методологија и носат одлука за почеток на преговори со Скопје и со Тирана;
- Во календарот на ЕУ предвиден е состанок на Европскиот совет на 26 и 27 март, кога веќе ќе бидат завршени и локалните избори во Франција, закажани за периодот од 15 до 22 март.
Се смета дека клучно за македонското досие ќе биде пред Европската комисија во февруари да го затвори скратениот извештај за земјава, во Собранието да се донесе нов закон за јавното обвинителство. Тоа пред два дена го потврди и шефот на македонската дипломатија, Никола Димитров. За подобра позиција на земјата во пресрет на одлуките на ЕУ, Димитров сугерира усвојување на законот за јавно обвинителство – чекор кој, како што рече министерот, ќе им ја отежни позицијата на одредени земји членки да кажат „не“ за почеток на преговори со С. Македонија.