Најмалку тројца руски воени разузнавачи на ГРУ отпатувале во Барселона меѓу ноември 2016 и декември 2017 година – пред референдумот за независност на Каталонија. Ова го покажува истрагата на тимот за истражувачко новинарство Bellingcat, спроведена заедно со шпанскиот весник „El Pais” и со Civic Media.
Станува збор за Денис Сергеев, Алексеј Калинин и Михаил Опришко, припадници на елитната воена група во рамки на ГРУ позната како „Дивизија 29155“.
Според извори во дипломатски кругови, шпанската влада долго време се сомнева дека Русија се меша во внатрешните работи на Шпанија.
Извори на Еl Pais во шпанската полиција велат дека ги знаат руските агенти и биле свесни за нивниот ангажман во шпиунски операции во други европски земји. Но, тие одбиваат да потврдат дали тие биле вмешани во каков било обид за дестабилизација на Шпанија со помагање на каталонското сепаратистичко движење.
Врховниот суд на Шпанија веќе ја испитува вклученоста на руските разузнавачки служби во референдумот за независност на Каталонија кој се одржа во 2017 година.
Кремљ и руското Министерство за надворешни работи категорично негираа каква било вмешаност во случувањата во Каталонија и воопшто во Шпанија. Кон крајот на минатиот месец, руската влада обвини неколку шпански медиуми дека водат „антируска кампања“
Инаку, според податоците од истражувањето, генералот Денис Сергеев, кој е ветеран на ГРУ бил најактивен во делувањето во Шпанија. Тој прв ја посетил Барселона на 5 ноември 2015 година. Долетал од Москва претставувајќи се како Сергеј Федотов. Шест дена подоцна, се враќа во руската престолнина, но не од Каталонија, туку од швајцарскиот град Женева.
Меѓу неговото прво патување во Каталонија и неговото последно патување – на 29.09.2017 година, на само два дена пред референдумот за независност на 1 октомври, тој го посетил регионот уште неколку пати а редовно се враќал во Москва преку Швајцарија.
Алексеј Калинин и Михаил Опришко, другите двајца осомничени агенти на одредот 29155, според Bellingcat во Барселона биле само еднаш.
Калинин во Барселона пристигнал еден месец по Сергеев, на 14 декември 2016 година. И тој имал лажен идентитет и е заведен како Алексеј Никулин. Во Барселона бил три дена, но за разлика од Сергеев тој за Москва се вратил преку главниот град на Италија, Рим.
Калинин се смета за еден од најактивните членови на ГРУ. Неговото присуство се забележува не само во Европа, туку и во Кина, Турција, Израел и во Дубаи, покажуваат информациите до кои дошле од Civic Media.
Калинин долго време е во фокусот на западните разузнавачки служби кои сметаат дека е вмешан во многу операции. Тој е на листата со десетина имиња на агенти на ГРУ кои ги следат британската, француската и швајцарската агенција за контраразузнавање, им потврдиле на Bellingcat извори од службите на овие држави.
Третиот руски шпион, Михаил Опришко, пристигнал во Барселона во декември 2017 година, откако шпанската влада ја презеде власта во Каталонија суспендирајќи ја декларацијата за независност донесена од локалниот парламент. Сè уште не е јасно колку време Опрешко останал во Шпанија.
Единицата 29155 на која и припаѓаат овие тројца агенти е составена од околу 20 лица со разновидни и комплементарни способности, вклучувајќи експерти за компјутери, технологија, криптографија, па дури и медицина; сите со исклучително познавање за користење оружје.
Клучна личност во одделот е Сергеев. Тој е роден 1973 година во Ушарал, мало гратче кое сега се наоѓа во Казахстан. Сергеев служел во сибирската армија, по што бил префрлен во Москва.
Таму се запишал на Елитната дипломатска воена академија, позната како „Конзерваториум“, од која ГРУ го регрутира својот персонал. Потоа станал висок офицер кој бил распределен на задачи во највисоките нивоа на разузнавањето. Тој имал нормален идентитет, но со одредено ниво на тајност. За неговиот ангажман да биде прикриен, тој се преставува како сопственик или или акционер во најмалку осум руски компании.
Во 2010 година, тој добива нов идентитет и од Денис Сергеев станува Сергеј Федотов. Под тоа име делува во Европа, Азија и на Блискиот исток, тврдат за истражителите претставници на западните разузнавачки служби кои го следат последниве години. Во 2015 година, ја посетил Бугарија во исто време кога трговецот со оружје Емилијан Гебрев бил мета на два обиди за атентат.
Во 2016 година, пред и по Брегзит тој бил во Велика Британија, открива деталната истрага на Bellingcat, Insider и Respekt.
YULIA SKRIPAL/FACEBOOK VIA AP
Неговото име излезе на виделина во 2018 во случајот со труење на поранешниот руски шпион Сергеј Скрипал и неговата ќерка Јулија. Британските власти, неколку месеци подоцна, за овој случај официјално обвинија двајца членови на руската разузнавачка служба.
Според информации од соговорници на тимот на истражувачи освен во овој случај, тој со сигурност е вклучен и во низа други дестабилизирачки операции преземени од Русија кон западните земји во кои без исклучок се и дејствија во Шпанија, каде во фокусот била Каталонија.