„Секоја од 28-те години самостојност беше исполнета со предизвици, премрежја и кризи“, рече претседателот на Собранието Талат Џафери, во својот говор одржан во Пелинце по повод Денот на Републиката 2 Август – Илинден.
Џафери додаде дека граѓаните заедно успеале да ги надминат сите кризи и дека чекориме напред кон остварување на нашите стратешки цели.
„Ова беше период на донесување тешки меѓутоа државнички одлуки кои го деблокираа нашиот пат кон евроатланската интеграција и во кој политички созреваа и граѓаните и државата. Се вративме на брзата пруга за евроатланска интеграција и се посветивме на воспоставување и градење добрососедски односи. Имавме интензивна дипломатија и активна партиципација на институциите на државата на регионалните и светските меѓународни настани, активно учествуваме во мировните мисии на НАТО, а нашите претставници се рамо до рамо со претставниците на полноправните земји-членки“,
рече Џафери.
Претседателот на Собранието посочи дека членството во НАТО за земјава ќе значи европски стандарди за достоинствен живот владеење на правото и правниот ред во државата без било каква дискриминација.
„Кога ги одбележуваме двата Илиндена и кога изразуваме неизмерна почит кон илинденците, сакам од ова место да се заблагодарам на сите граѓани на Република Северна Македонија за нивната истрајност, за нивната лојалност и за одговорното на аманетот на илинденците“,
рече Џафери.
„Сите сме деца на Илинден“ за Џафери е вистинскиот концепт за заеднички вредности.