Од опозициската партија повторно побараа оставка од министерот за здравство Венко Филипче
Активисти и функционери на ВМРО-ДПМНЕ оставија вечерва 1 071 каранфил на булеварот пред зградата на Владата во знак на почит кон починатите од ковид-19 во земјава.
„Починатите од корона не се само бројка, туку луѓе, човечки судбини кои одат на нечистата совест на Зоран Заев и на најнеспобниот министер за здравство Венко Филипче. Бараме оставка од Венко Филипче веднаш и сега“,
изјави на настанот Марија Андоновска, член на ИК на ВМРО-ДПМНЕ.
Бројката на починати од ковид-19 во земјава, од почетокот на епоидемијата, денеска стигна до 1 084, откако во последните 24 часа се регистрирани уште 13 смртни случаи, како што информира вечерва Министерството за здравство.
Според Андоновска, Заев и Филипче се главни виновници затоа што, како што рече, пандемијата урива рекорди, а болниците се полни.
„Тие 1 071 починат, не се само гола статистика, не се бројка, тие се 1 071 се семејства завиени во црно, 1 071 судбина, тоа се нечии родители, деца, браќа и сестри. Тие се луѓе од кои голем број можеби денес ќе беа меѓу нас доколку Филипче не беше толку неспособен и ги послушаше советите на ВМРО-ДПМНЕ уште на почеток на пандемијата. Но, наместо разум, Филипче покажа ароганција и надменост, и сето тоа, за жал, на штета на граѓаните“,
изјави Андоновдска, нагласувајќи дека „ова е најголемата трагедија која и се случува на Македонија по Втората светска војна“.
