До каде е состојбата со линданот, и дали е воопшто нешто откриено и соопштено?
На овие прашања Иницијативата О2 денеска побара одговори од Владата. Преку својата Фејсбук страница, прашањето му го упатија и генералниот секретар на Владата, Драги Рашковски, кој е член и на Работната група за справување со проблемот со линданот во ОХИС, група која Владата ја формираше во мај 2018 година.
Од Иницијативата ги потсетија надлежните дека ланскиот декември ветиле дека ќе се чистат големата и малата депонија истовремено, и дека процесот во зависност од методологијата на чистење би траел три до пет години, а би чинел од 40 до 260 милиони евра.
„Во декември 2018 Владата потпиша Меморандум за соработка со Канцеларијата за услуги на проекти на Обединетите нации (UNOPS) и со министерството за надворешни работи на Кралството Норвешка, за чистење на токсичниот отпад – линдан – во поранешната фабрика ОХИС и формирање на заеднички Фонд за таа цел. Колку средства се собраа за отстранување на линданот од ОХИС? Која метода ќе се користи? Малата депонија во оптимистичко сценарио на есен ќе започне да се чисти од линданот и др. опасен отпад. Големата кога ќе започне? Нели истовремено ќе се чистеа?“,
се дел од прашањата на О2.
Во објавата, 02 потсетуваат дека Владата лани во август одлучила да се формира Комисија која ќе ја утврдува веродостојноста на информацијата дали постои дива депонија на линдан надвор од кругот на ОХИС (во Пеленица) која уште од 2008 година се наоѓа во локалниот еколошки акционен план на општина Кисела Вода како реон за испитување.
„Во декември, Министерството за образование под притисок на јавноста и медиумите забрани екскурзии на ученици во Пеленица. Депонијата во Пеленица се ветуваше дека до Нова Година ќе се огради како ризична зона. Тендерот се објави дури на 22 март, за жичана ограда да се постави после два месеца. До пред месец и пол немало никакви табли со предупредување дека се работи за локација со опасен отпад и забрана за влез. Дали во меѓувреме се поставени, нема информација. Се смета дека има и трета депонија во кругот на фабриката ОХИС, покрај големата и малата. Кога ќе се започне со потребните анализи во Пеленица и третата депонија во ОХИС? До кога ќе се чека на прелиминарните првични анализи?“,
прашуваат од Иницијативата.
За случајот со линданот, „360 Степени“ беше помеѓу првите кои со своите стории алармираа за опасноста и за итната потреба од реакција.