За утре се прогнозира променливо облачно време со повремени врнежи од дожд кои во делови од Скопје се очекува да преминуваат во снег
Променливо облачно време со повремени врнежи од дожд е прогнозата за денешниот ден од Управата за хидрометеоролошки работи (УХМР).
По магливото утро, од УХМР велат дека во текот на денот од запад ќе се прошират повремени врнежи од дожд, а на планините ќе бидат од снег. Повремени врнежи ќе има и преку ноќта. Во текот на денот ќе дува слаб до умерен, а вдолж Повардарието повремено засилен ветер претежно од југоисточен правец. Утринската температура ќе биде од минус 5 до 1 Целзиусов степен, а во текот на денот од 2 до 10 степени.
Во Скопје денеска ќе има умерено до значително облачно време, а од пладневните часови во делови од котлината ќе има услови за краткотарен дожд. Температурата ќе се искачи до 7 степени.
И за утре синоптичарите најавуваат променливо облачно време со повремени врнежи од дожд, а на планините и на некои повисоки места претежно во западните и северните делови од снег. Ќе дува слаб до умерен, а вдолж Повардарието повремено засилен ветер од северен правец. Во Скопје ќе биде умерено до значително облачно со повремен краткотарен дожд кој во делови од котлината ќе преминува во снег.
Температурата утре во текот на денот ќе се движи од 3 до 10 Целзиусови степени.