Од САД, каде што Таравари учествува на 79-то Собрание на ОН, преку видео-врска во пресрет на 100 дена влада, истакна дека конечно „дојде крајот на 22-годишната клика на ДУИ“ и изрази благодарност до секој кој учествувал во промените
Арбен Таравари, претставник на коалицијата „Вреди“ во пресрет на 100 дена од новата Влада на Република С.Македонија, порача дека е започната нова ера, во која вели тој, не се чувствува тежината на неправдата, а иднината е во моќта на народот.
Од САД, каде што Таравари учествува на 79-то Собрание на ОН, преку видео-врска истакна дека конечно „дојде крајот на 22-годишната клика на ДУИ“ и изрази благодарност до секој кој учествувал во промените.
„Драги присутни пријатели, пријателки – сопатници за промените, иако не сум физички со вас поради официјална посета на САД, знам дека денес во Скопје нè зближи длабокото чувство на надеж, гордост и триумф. Не за нас, туку за секој Албанец кој 22 години живееше под сенката на корумпираната клика која му го одземаше здивот на нашиот народ. 22 години! Речиси четврт век, каде секој од нас доживеа неправда, каде светлината на надежта секојдневно ја вклучуваше и гасеше една моќна машинерија која не прашуваше за потребите на народот. ДУИ беше страв врз кој беше изградена империја на корумпирани политичари, додека народот се чувствуваше слаб пред нивната дрскост“,
вели Таравари во својот говор.
Понтаму вели тој, Албанецот сега е ослободен од режимот.
„Сите заедно успеавме да го ослободиме Албанецот од режимот кој не држеше во заложништво повеќе од две децении. Се исплати трудот да се тргнат од сцената оние кои со насмеани лица, но со мрачни души, им ја негираа иднината на нашите млади луѓе, кои ја искористија власта за да се збогатат, оставајќи ги граѓаните во сиромаштија и очај“,
нагласи Таравари.
Тој додава дека Албанците се ослободени од политичка партија и ослободени од систем кој го презираше и омаловажи нашиот народ.
„Пред 100 дена започна нова ера! Ера во која веќе никој не ја чувствува тежината на неправдата, каде ниту едно албанско семејство не чувствува дека нема иднина. Заедно, ја градиме оваа иднина! Иднина во која моќта лежи во рацете на народот, а не во џебовите на корумпираните. Во овој период од 100 дена, владеењето на коалицијата ВРЕДИ докажа дека и во Северна Македонија може поинаку да се владее, на народот може да му се служи без скандали, со чест и достоинство, а не за лични и групни интереси“,
потенцираше Таравари.
Тој во својот говор се задржа и во Министерството за здравство, ресорот со кој раководи. Истакна дека Министерството за здравство започнало со закрепнување на здравствениот систем.