Од вкупно 14 лица кои го загубија животот во пожарот во тетовската модуларна болница, 12 биле пациенти, а две лица биле во придружба на свои роднини, односно едното лице е сопруга на пациент, а другото е ќерка на пациентка
По обвинителен налог извршена е обдукција и на почината пациентка, која настрадала од ковид-19 и за чиј живот се борел медицинскиот персонал непосредно пред избувнувањето на пожарот
Загинатите во пожарот во модуларната болница во Тетово се на возраст од 29 до 79 години и од 14-те лица, шест се мажи, а осум се жени, објави Основното јавно обвинителство. Од загинатите, 12 лица биле хоспитализирани како пациенти во ковид-болницата, а две лица, и тоа сопруга на пациент и ќерка на пациентка, се надворешни лица што не биле хоспитализирани.
„Причината за нивното присуство во моментот на несреќата, односно дали биле подолго време присутни во болницата или влегле внатре по опожарувањето за да ги извлечат своите роднини се истражува“,
велат од Обвинителството.
По обвинителен налог извршена е обдукција и на почината пациентка, која настрадала од ковид-19 и за чиј живот се борел медицинскиот персонал непосредно пред избувнувањето на пожарот.
„Телото на веќе починатата пациентка било изнесено во моментот на избувнување на пожарот. Обдукцијата по барање на Обвинителството беше извршена за точно утврдување на причините за смртта, при што се констатира дека настанатата смрт не е последица од пожарот“,
велат од Обвинителството.
Оттаму соопштија се преземени мерки за обезбедување видеоснимки од ЈЗУ Клиничка болница во Тетово, од и околу болницата, околните деловни објекти, станбени згради, куќи, како и обезбедување на целокупниот видеоматеријал објавен, како од индивидуални поединци така и од социјалните мрежи. Снимките се вештачат по издадени наредби од обвинителството и се очекува извештаите од нивната анализа да помогнат во расчистување на настанот.
Донесени се наредби до Одделот за криминалистичка техника од Скопје за подигнување материјални докази и обезбедување на трагите од местото на настанот, како и наредби за нивно вештачење, со цел утврдување на причинско-последичната врска за настанување на пожарот. Во таа насока донесена е наредба за ангажирање вешто лице од областа на електротехниката, кој беше присутен и на самото место во опожарениот објект и чија експертиза ќе одговори на прашањата за причинско-последичната врска за настанување на пожарот.
„Сослушани се дел од сведоците од местото на настанот, дел од лекарскиот персонал кој бил присутен во модуларната ковид-Болница ноќта кога е избувнат пожарот. Во меѓувреме, сослушани се и се сослушуваат и останатите лица кои можат да дадат потребни известувања во врска со настанатиот пожар. Обвинителството издаде наредба на СВР-Тетово за одземање на целокупната документација во врска со изградбата на модуларната болница, од самата болница, а исто така и од правното лице – изведувачот на изградбата“,
информираат од Обвинителството.
Имајќи ја предвид итноста и карактерот на трагичниот настан, додаваат од Обвинителството, се соработува и со други надлежни институции, односно со Дирекција за заштита и спасување, со полициски службеници од Одделот за криминалистичка техника при МВР-Скопје, вешти лица од областа на електротехниката, како и претставници на „ЕВН Македонија“ и нивни вешти лица, ги презема сите неопходни мерки и активности, со цел да спроведе итна истрага, во насока да се утврдат причините за трагичниот настан.