Во врска со чантата, од партијата велат дека следниот пат кога ќе објавуваат фотографија, прво нека ја проучат разликата меѓу таа што ја носи неговата сопруга на настанот со онаа којашто ја објавија денеска
Опозицискиот Социјалдемократски сојуз на Македонија (СДСМ) му се „извини“ на скопскиот градоначалник Орце Ѓорѓиевски за наводите дека неговата сопруга носела чанта од 30 000 евра на вчерашниот настан на кој тој даваше отчет за сработеното во стоте дена откако ја презеде функцијата градоначалник на главниот град.
Сепак, извинувањето од социјадемократите, кое дојде преку писмено соопштение, е во ироничен тон, со низа забелешки кои се однесуваат на тендерски постапки иницирани од Градот Скопје, а кои ги добиле фирми, според СДСМ, блиски до власта.
„Му се извинуваме на Орце Ѓорѓиевски што му ја отворивме најболната тема, каде завршуваат парите на граѓаните од тендерите кои ги добиваат двете омилени фирми на власта – ‘Пирамид билдинг’ и ‘Ленди груп’. За два месеци 96 милиони денари или 1,56 милиони евра добиле омилените фирми на Орце и на ВМРО-ОКГ од Град Скопје, каде тој е градоначалник. 20 милиони денари е тендерот за ‘Пирамид билдинг’ со склучен договор на 05.12.2026 година. 76 милиони денари е тендерот за ‘Ленди груп’ со склучен договор од 28.01.2026 година. Едни исти фирми, на централно и на локално ниво добиваат тендери и ние да им се извиниме? Да не треба да му се извинуваме на Орце и за 56-те тендери на ‘Пирамид билдинг’, каде е татко му на шефот на Кабинет на Мицкоски, Нелоски? Или да се извинуваме и 74-те тендери на ‘Ленди груп’ вредни 17,5 милиони евра? Вие да делите тендери и да се луксузирате на грбот на народот со авиони, часовници, чанти, а народот кој не може да врзе крај со крај да ви се извинува? Извини Орце, да не се малку тендери, да не треба повеќе?“, се наведува во соопштението од СДСМ.
Од опозициската партија со соопштението објавија принтскрин-фотографии од веб-страницата на Бирото за јавни набавки од тендерите што ги добиле двете фирми посочени од СДСМ.
Во врска со чантата, од партијата велат дека следниот пат кога ќе објавуваат фотографија, прво нека ја проучат разликата меѓу таа што ја носи неговата сопруга на настанот со онаа којашто таа ја објави денеска.
Од СДСМ, во таа смисла пишуваат:
„Очигледна е (разликата). Да, да, и ние и граѓаните веруваме дека чантата е 944 денари. Веруваме, да.“
Опозицискиот Социјалдемократски сојуз (СДСМ) денеска објави дека сопругата на Ѓорѓиевски на вчерашниот настан во Македонската филхармонија по повод 100 дена од неговиот мандат се појавила со брендирана чанта марка „ермес“, посочувајќи дека станува збор за една од најексклузивните и најскапи брендирани чанти во светот.
На наводите на опзоциската партија реагираше сопругата на скопскиот градоначалник, Мартина Ѓорѓиевска, која во објава на својот фејсбук-профил напиша дека чантата што ја носела на настанот нема никаква врска со брендот „Ермес“ ниту, пак, чини 30 илјади долари, туку дека ја купила на попуст за 944 денари од продавница во земјава.
Таа побара јавно извинување за, како што наведе, изнесените невистини, но и повлекување на лажните тврдења. Во спротивно најави дека ќе ги искористи сите правни механизми за заштита на честа и угледот, порачувајќи дека политиката не смее да се води преку лаги и лични дискредитации.
За чантата на сопругата се огласи и скопскиот градоначалник Орце Ѓорѓиевски, кој посочи дека од СДСМ претставуваат вакви сензации бидејќи не можат да му најдат ниту една сериозна замерка за работата во Град Скопје, во време кога гледаат дека главниот град повторно се исправува на нозе, а резултатите се видливи.
И тој побара јавно извинување во рок од 24 часа од СДСМ, објавено на истата фејсбук-страница каде, како што додава, ја пласираа лажната вест, како и во медиумите.
„Доколку тоа не се случи, ќе поднесам пријава и ќе ги искористам сите правни механизми за заштита на мојот и на угледот и честа на моето семејство“,
напиша Ѓорѓиевски.