Од СДСМ додаваат дека до Орбан требало да биде поставено и прашањето зошто „не помогна, како стратешки партнер, во периодот кога договарале кредити од сомнително, кинеско потекло, да се промени преговарачката рамка, како што ветуваше Мицкоски“
Зошто амбасадорот на Унгарија, инаку земја претседавач на ЕУ, гласал за одвојување на Македонија и Албанија. Ова е прашањето што од Социјалдемократскиот сојуз (СДСМ) велат дека премиерот Христијан Мицкоски требало да му го постави на унгарскиот претседател на Владата, Виктор Орбан, на нивната денешна средба.
„Денешната средба меѓу Мицкоски и Орбан не носи ништо ново ниту надежно за македонските граѓани. Оваа посета Мицкоски требаше да ја искористи и јавно да го праша Орбан, зошто амбасадорот на Унгарија, инаку земја претседавач на ЕУ, гласал за одвојување на Македонија и Албанија. Зошто македонските граѓани, во неговото претседавање се доведени во ситуација да бидат последни во редот за приклучување во ЕУ? Ако тоа воопшто некогаш се случи“,
се вели во соопштението од СДСМ.
Од СДСМ додаваат дека до Орбан требало да биде поставено и прашањето зошто „не помогна, како стратешки партнер, во периодот кога договарале кредити од сомнително, кинеско потекло, да се промени преговарачката рамка, како што ветуваше Мицкоски“.
„Мицкоски и Орбан не понудија ништо за граѓаните, освен што одлучија да ги задолжат за нови 500 милиони евра и да ја закопаат европската перспектива на државата“,
се додава во соопштението.
Според опозицискиот СДСМ, одвојувањето на Албанија и прекинот на преговорите со Европската Унија е поради Мицкоски и ВМРО-ДПМНЕ.
„Денеска наместо да биде голем ден на славје, на надеж, на нови можности за македонските граѓани, ние зборуваме за дестабилизации, изолации, етнички прашања. За оваа состојба не е виновен никој друг освен ВМРО-ДПМНЕ кои години наназад работат интензивно на попречување на европската интеграција на државата“,
велат од СДСМ во денешното соопштение.
Унгарскиот премиер Виктор Орбан на денешната прес-конференција со неговиот македонски колега Христијан Мицкоски беше прашан зошто амбасадорот на Унгарија гласал за одвојување на пакетот и продолжување на преговорите за Албанија.
Тој не одговори конкретно на новинарското прашање, што Унгарија ќе направи за Македонија да ги продолжи преговорите со ЕУ и дали можеби ќе испрати некого на кафе, како што тоа беше случај со него лично, кога на состанокот на европските лидери на кој се расправаше за започнување преговори со Украина, Орбан, кој иако тврдеше дека Украина исполнила само четири од условите и треба да почека, во последен момент се откажа од најавуваното вето и ја напушти салата, со што им помогна на лидерите да донесат едногласна одлука за Украина во негово отсуство.