Од Кривичниот суд ги предизвикуваат адвокатите, директорите во банките, уредниците во медиумите, телекомуникациските оператори… чиј примања, како што тврдат, се е повисоки од нивните, да донираат
Откако Уставниот суд ја укина Уредбата за минимална плата со која беа опфатени и судии, од Основниот кривичен суд во Скопје објавија дека 48 судии од овој суд донирале од платата и собрале 575 320 денари (околу 9 300 евра).
„Кривичниот суд, како што доликува на слоганот ’Во името на граѓаните на РСМ‘, од донациите на 48 судии, обезбеди 50-ина плати, односно барем за еден месец спречи 50-ина отпуштања на работници кои се најзасегнати од последиците поврзани со пандемијата од вирусот ковид-19. Како никогаш досега, со исклучок на пет судии, судиите од Кривичниот суд покажаа единство, колегијалност, а воедно и чувство за солидарност, правичност и етичност со граѓаните, па имајќи ја предвид состојбата во која се наоѓа државата, донираа вкупно 575 320 денари или во просек по 12 000 денари од судија, што е повеќе од 20 проценти од судиската плата“,
велат од судот.
Оттаму ги предизвикуваат сите граѓани кои имаат примања над 40 000 денари, како и функционерите, да го следат нивниот пример и да донираат од сопствените примања.
„Имајќи предвид дека примањата по разни основи (плати, додатоци, авторски права и сл.) на дел од адвокатите, нотарите, сопствениците и уредниците на медиумите, директорите и раководителите во банките, телекомуникациските оператори, ЕВН, претседателите и нивните соработници во синдикалните организации, сопственици на угостителски објекти и обложувалници, се повисоки од оние на судиите во Кривичниот суд, ги предизвикуваме да покажат доблест и солидарност, да донираат сразмерно со нивните примања“,
велат од судот.
Инаку, кога Владата ја донесе Уредбата за минимална плата, едни од првите кои реагираа беа здруженијата на судии и обвинители. Здружението на судии најави и иницијатива пред Уставниот суд за оценување на уставноста, а потоа Уставен на седница прво времено ја запре Уредбата, а потоа и ја поништи.
Откако беше укината, Здружението ги повика судиите да донираат минимум 20 проценти од платата.