Барањето упатено до судија на претходна постапка следува откако Министерството за внатрешни работи (МВР) поднесе кривични пријави против поранешниот директор на истражниот затвор „Скопје“ во Шуто Оризари, Ф.А. и затворскиот полицаец С.К.. Тие, како што информираа од МВР, се приведени и изнесени пред пред судија на претходна постапка поради сомнежи за злоупотреба на службена положба и овозможување бегство на лице лишено од слобода
За десет лица, вработени во КПУ„Затвор“ Скопје се бараат мерки на претпазливост откако претходно беше поднесена кривична пријава од Одделот за внатрешна контрола, криминалистички истраги и професионални стандарди при МВР, информираат од Основното јавно обвинителство за гонење на организиран криминал и корупција (ОЈО ГОКК).
Барањето упатено до судија на претходна постапка следува откако Министерството за внатрешни работи (МВР) поднесе кривични пријави против поранешниот директор на истражниот затвор „Скопје“ во Шуто Оризари, Ф.А. и затворскиот полицаец С.К.. Тие, како што информираа од МВР се приведени и изнесени пред пред судија на претходна постапка поради сомнежи за злоупотреба на службена положба и овозможување бегство на лице лишено од слобода.
Од ОЈО ГОКК велат дека барањето да се определат мерки е поради постоење сомневање дека осомничените како соизвршители сториле кривични дела: противзаконито ослободување на лице лишено од слобода и злоупотреба на службена положба и овластување. Прво и десетоосомничениот, пак, како што велат од ОЈО ГОКК, сториле и кривично дело овозможување бегство на лице лишено од слобода.
Во описот на случајот од ОЈО ГОКК се наведува дека првосомничениот злоупотребувајќи ја својата службена должност на директор на установата, во период од март до јули 2024, со намера да им овозможи корист односно противзаконска поволност на петмина осуденици и привремено да ги ослободи, дозволил и наредил осудените кои биле од висок безбедносен ризик во повеќе наврати да добијат и да се стекнат со поволности што согласно судските одлуки не им следувале.
„Постапувајќи спротивно на одредбите на законските и подзаконски акти за спровод на осудени лица, биле издавани наредби со кои се дозволило осудените лица да бидат спроведени до нивните домови и до други локации за приватни потреби, иако во постапката за спроведување вон установа јасно е наведено дека спроведувањето на лица лишени од слобода од казнено поправната установа се спроведува единствено до суд, здравствена установа или друг орган“, се вели во соопштението од ОЈО ГОКК.
Според описот од ОЈО ГОКК, ваквото противзаконско спроведување се вршело така што осудените лица доставувале молба до првоосомничениот кој со факсимил или потпис ги одобрувал молбите на осудените повремено да го напуштат затворот.
Врз основа на потписот, се додава во соопштението, третопријавениот што бил командир на затворска полиција и задолжен за спровод, иако знаел дека тоа е спротивно на закон и процедурите за спровод, изготвувал наредба која била одобрена од првоосомничениот, а во неколку наврати тоа го сторил второосомничениот – затворски полицаец и личен возач на директорот.
„Одобрените наредби третоосомничениот ги предавал на останатите осомничени затворски полицајци, кои иако знаеле дека таков спровод на осудено лице е спротивен на законот и процедурите, го извршувале користејќи службени возила и службено гориво на установата и ги носеле осудените до определените места ослободувајќи ги да извршуваат приватни работи, а по 8 до 10 часа ги враќале назад во затворот“, додаваат од ОЈО ГОКК.
Според Обвинителството, за извршената наредба на дел од осомничените затворски полицајци првоосомничениот им одобрувал прекувремени работни часови, а со противзаконските дејствија била предизвикана штета на државниот буџет.
Десетоосомничениот пак, како затворски полицаец, при вршење физички проверки за бројната состојба на затворените лица не пријавил дека одредена група на осудени лица сместени во импровизирани простории не се присутни, туку напротив, констатирал дека нема отсутни.
„При ненајавен вонреден надзор од страна на Управата за извршување на санкции, било констатирано дека недостасуваат 11 осудени лица, а истите не биле пријавени дека не се присутни“, велат од Обвинителството.
Со непреземање на дејствија што му биле во надлежност, како што додаваат од ОЈО ГОКК, осомничениот сторил кривично дело овозможување бегство на лице лишено од слобода, а за истото дело е осомничен и тогашниот директор на затворот кој бил должен да преземе соодветни мерки, во однос на просториите во кои биле сместени осудените лица, а кои не ги исполнувале законските услови.
Со непреземање на дејствија и активности од Обвинителството велат дека директорот им овозможил на осудените лица да бидат сместени во импровизираните простории без посебен надзор како што налага Законот за извршување на санкции, со што создал и овозможил услови кои што довеле до нивно бегство.
Јавниот обвинител до судијата на претходна постапка при Основен кривичен суд бара да бидат определени мерки на претпазливост и тоа: забрана за напуштање на живеалиштето, односно престојувалиштето, обврска на осомничените да се јавуваат повремено на определено службено лице или кај надлежен државен орган кој ќе го определи Судијата на претходна постапка, како и привремено одземање на патна или друга исправа за преминување на државната граница односно забрана за нејзино издавање. Исто така, се бара и забрана за приближување или воспоставување, односно одржување контакти или врски со определени лица – осомничените во оваа постапка, како и забрана за преземање на определени работни активности – затворски полицаец, а кои се поврзани со кривичното дело.