Во првото полугодие од 2017 година македонските компании плаќале четврта најевтина струја во Европа по цена од 69,5 евра мегават-час, вели опозицискиот лидер и додава оти за пет години граѓаните во земјава плаќаат осма најскапа струја во Европа по цена
Лидерот на опозициската ВМРО-ДПМНЕ, Христијан Мицкоски, во објава на Фејсбук пишува дека во периодот кога тој бил директор на ЕЛЕМ и советник на премиерот во периодот до 2017 година струјата што ја плаќале македонските компании била четврта најевтина во Европа.
„Бидејќи владата на СДСМ сака да се споредува со периодот кога јас бев советник на претседателот на Владата (од април 2015 до јуни/јули 2017 година) и генерален директор на ЕЛЕМ (од септември 2016 до август 2017 година), тогаш да ја направиме таа споредба. Имено, во првото полугодие од 2017 година македонските компании плаќале четврта најевтина струја во Европа по цена од 69,5 евра мегават час“,
пишува Мицкоски на Фејсбук.
Во првото полугодие од 2022 година, пак, додава опозицискиот лидер, компаниите во земјава плаќаат осма најскапа струја во Европа по цена од 168,64 евра од мегават-час.
„За пет години цената на струјата за македонските компании владата на СДСМ ја зголеми за речиси 2,5 пати. Македонското стопанство во првото полугодие од 2022 година плаќа осма најскапа струја во Европа според Евростат и Државниот завод за статистика. Невистина е дека владата се грижи за стопанството. Невистина е дека владата им помага на повеќе од 72 000 компании“,
посочи тој.
Мицкоски додава дека според ДЗС, компаниите кои годишно трошат меѓу 500 и 2 000 мегават часови струја се најголемиот дел од оние 72 000 компании за кои владата тврди дека им помага, плаќаат осма најскапа струја во Европа, односно, како што вели плаќаат 10,391 денари киловат час што е еднакво на 168,64 евра мегават час.
„Според Евростат во второто полугодие од 2022 година компаниите во регионот плаќаат многу поевтина струја од македонските компании:
Србија 89,3 евра мегават час;
БиХ 71,4 евра мегават час;
Турција 117,1 евра мегават час;
Косово 65,9 евра мегават час;
Хрватска 141 евра мегават час;
Словенија 143,5 евра мегават час“,
додава опозицискиот лидер.
Во меѓуврме, од владејачкиот СДСМ реагираат оти како директор на ЕЛЕМ, Мицкоски во својот мандат не направил ниту една нова хидроцентрала, а цената на струјата ја зголемил двојно без да има економска или енергетска криза.
„Мицкоски во периодот додека беше советник за енергетика во Владата си направи своја хидроцентрала, додека цената на струјата ја зголеми двојно, без да има никаква светска економска или енергетска криза. Мицкоски од државата добил 33 илјади метри квадратни, а денеска не ја дава струјата на граѓаните, во време на најголема светска енергетска криза кога секој енергетски капацитет е од суштинска важност“,
посочуваат од СДСМ.
Ако Мицкоски е толку загрижен за состојбата во енергетиката, додаваат од партијата, нека ја даде струјата на граѓаните и нека ги повика пратениците да се откажат од блокадите на важни закони во Собранието.
„Срамно е Мицкоски да прави споредба на периоди на нормално функционирање на светот и период на постпандемија, на енергетска и економска криза која го тресе целиот свет“,
се наведува во реакцијата на Социјалдемократскиот сојуз.
Претходно вчера, поранешниот министер за финансии Џевдет Хајредини во контекст на актуелната дебата меѓу власта и опозицијата околу справувањето со енергетската криза, го повика Мицкоски да објасни зошто ниту една од електричните централи предвидени во програмата на партијата „Преродба во 100 чекори“ не е изградена кога тој бил директор на тогашното АД ЕЛЕМ, сега АД „Електрани на Северна Македонија“ (ЕСМ).