Одговарајќи на прашања за европскиот пат на земјата, премиерот нагласи дека Борел и Вархеји биле јасни оти промена на преговарачката рамка не е реална и ги повика партиите со реални чекори, а не само декларативно да покажат дека се за зачленување во ЕУ. Рече дека верува оти во земјава постои демократски и политички капацитет да се донесат потребните одлуки, а алудирајќи на опозицијата, испрати пораки дека да се зборува едно пред амбасадите, а друго пред народот, не носи корист никому
По синоќешниот митинг на ДУИ во Чаир, премиерот и лидер на СДСМ, Димитар Ковачевски, вели дека неговиот коалициски партнер Али Ахмети во говорот испратил јасна порака дека и тој како него е за зачленување на државата во ЕУ.
На прашањето што мисли за повикот на Ахмети до останатите лидери на албанските партии да се обединат во заеднички фронт за Европа и дали во таков случај тој би ги зел сите во коалиција, Ковачевски одговори:
„Тоа ќе мора да го прашате за коментар господинот Ахмети, јас не можам да коментирам негови изјави. Меѓутоа, како што јас ја гледам, пораката е јасна дека господинот Ахмети, како и јас и претседателите на партиите во владината коалиција, е за зачленување на Северна Македонија во ЕУ“.
Дали при сценарио на влез на нови коалициски партнери, премиерот можеби стравува дека ќе се наруши балансот на министри Албанци и Македонци, Ковачевски порача дека не стравува, ниту некогаш стравувал по кој било основ.
„За мене сите луѓе се исти и пред закон и пред критериуми за оценување на нивната професионалност. За мене етничка припадност не е професија“,
беше дел од коментарот на премиерот.
Одговарајќи на прашања за европскиот пат на земјата, за што се потребни уставни измени за вметнување на Бугарите и други заедници во Уставот, Ковачевски повтори дека тоа е само првата од повеќе одлуки кои ќе треба да се носат со двотретинско мнозинство (гласови од 80 пратеници) во парламентот. Тука се, нагласи, и одлуките за реформи во правосудството, за децентрализацијата итн.
Високиот претставник на ЕУ за надворешни работи и безбедносна политика и потпретседател на Европската комисија, Жозеп Борел, и еврокомесарот за проширување Оливер Вархеји, нагласи премиерот, беа јасни дека промената на преговарачката рамка не е реална и ги повика партиите со реални чекори, а не само декларативно да покажат дека се за зачленување во ЕУ.
„Овој процес на зачленување во ЕУ не е процес на еден човек, на една политичка партија, ниту е процес на една влада, туку тоа е обврска и одговорност на сите политички партии во државата, особено оние застапени во парламентот. Ние имавме првпат после 22 години Совет за стабилизација и асоцијација на кој јасни пораки испратија и Борел и Вархеји, кои кажаа дека преговарачката рамка во која стојат обврските и критериумите се изгласани и доставени од 27 земји членки на ЕУ. Јас ги повикувам сите политички партии со реални, одлучни чекори и носење на одлуки, а не само декларативно каде се кажува дека се за ЕУ, а од друга страна“,
рече Ковачевски.
Тој додаде дека верува оти во земјава постои демократски и политички капацитет да се донесат потребните одлуки, а алудирајќи на опозицијата испрати пораки дека да се зборува едно пред амбасадите, а друго пред народот, не носи корист никому.
„Зборувањето едно пред амбасади, а друго пред народот, не му користи никому. Зборувањето дека некој може да ја промени преговарачката рамка најдобро беше демантирано од страна на потпретседателот на ЕК кој беше јасен во однос на позициите на ЕУ визави преговарачката рамка и нашето зачленување во ЕУ. Двајцата изразија оптимизам дека може да станеме членка на ЕУ. Ние преговараме со Брисел, со ЕУ, со ниту една соседна земја“,
рече Ковачевски.