Кога во Владата има заробен и потчинет ВЛЕН, антиалбанските сили се охрабруваат, велат од ДУИ

ДУИ тврди дека претставниците на ВЛЕН избрале молк и сервилност наместо да ги бранат достигнувањата од Охридскиот рамковен договор

Демократската унија за интеграција (ДУИ) упати директни критики до коалицијата ВЛЕН, обвинувајќи ги дека со својата „заробена и потчинета“ позиција во Владата создале клима во која се напаѓаат правата на Албанците.

Според ДУИ, последните изјави на претседателот на Уставниот суд, Дарко Костадиновски, не се случајни, туку резултат на политичката немоќ на албанскиот партнер во власта.

„Кога во Владата имате слабо, заробено и потчинето претставување како ВЛЕН, тогаш антиалбанските сили се чувствуваат охрабрени и зајакнати“,

велат од ДУИ во денешното соопштение.

ДУИ тврди дека претставниците на ВЛЕН избрале молк и сервилност наместо да ги бранат достигнувањата од Охридскиот рамковен договор.

Според партијата, овој молк се толкува како дозвола за напади врз албанскиот јазик и поткопување на мултиетничкиот карактер на државата.

Од ДУИ порачуваат дека албанскиот јазик и правата на Албанците не се прашања за кои може да се преговара или кои смеат да се релативизираат.

„Тие се уставни права и дел од политичкиот поредок што ја гарантира стабилноста и соживотот во државата“,

додаваат од ДУИ.

Партијата смета дека одговорноста за актуелната состојба паѓа подеднакво и врз оние што даваат антиалбански изјави, но и врз оние кои се на власт, а не реагираат.

„Денес сме сведоци на изјави и постапки кои порано никој не се осмелуваше јавно да ги артикулира“,

се вели во соопштението на ДУИ.

Уставниот суд се однесува како југословенска политичка елита, албанскиот јазик во „Безбеден град“ е уставна обврска

Од партијата нагласуваат дека ќе продолжат со политичко дејствување за заштита на еднаквоста, Охридскиот рамковен договор и мултиетничкиот карактер на државата.

Денешното соопштение од ДУИ доаѓа како реакција на вчера изнесените ставови на претседателот на Уставниот суд кој на седницата на која се расправаше и одлучуваше по иницијативите против одредби од Законот за прекршоци поврзани со системот „Безбеден град“ рече дека пораките што граѓаните ги добиваат за сторен прекршок треба да бидат на македонски, бидејќи тоа е службен јазик во државата. Тој не се согласува со подносителите на иницијативите дека со тоа што во Законот не е наведен албанскиот јазик се ускратува правото на негова употреба.

Уставен не најде ништо спорно во системот „Безбеден град“ – ги отфрли иницијативите против измените на Законот за прекршоците

За ова од ДУИ вчера побараа оставка од Костадиновски, а денеска со реакција излезе и коалицијата која е дел од власта, ВЛЕН.

ДУИ бара итна оставка од Костадиновски: Дискриминаторски се неговите ставови дека пораките од „Безбеден град“ треба да бидат само на македонски

ВЛЕН ги обвини претходните политички елити за „неодговорност и манипулации“, тврдејќи дека оставиле еродиран систем и лажно се фалеле дека ги затвориле прашањата за Албанците додека се богателе.

Од ВЛЕН се децидни дека системот за видеонадзор мора да ги известува и санкционира граѓаните и на албански јазик. Според нив, ова не е политичка волја, туку уставна обврска и почитување на едно темелно право.