„Уставните измени не се само правна обврска, тие претставуваат морален и стратешки императив кој обезбедува нашата држава да остане на патот кон европската интеграција. ДУИ секогаш била гарант на овој процес, и нема да дозволиме политички блокади да ја попречат иднината на нашите граѓани“, велат од партијата
Дојде времето да се исполнат дадените ветувања на нашите граѓани кои континуирано ја поддржуваат евроатлантската интеграција на Северна Македонија, велат од Демократската унија за интеграција (ДУИ) по едногласната одлука на амбасадорите на земјите членки на ЕУ за одвојувањето на Скопје и Тирана од патот кон ЕУ.
Својот став околу последниот развој на настаните поврзани со евроинтегративниот процес на земјава од ДУИ го пренесоа преку писмено соопштение, во кое го потврдуваат, како што велат, нивното непоколебливо залагање за европската интеграција на Северна Македонија.
Последните настани со продолжувањето на преговорите на ЕУ со Албанија одвоено од С Македонија, според опозициската партија, јасно покажуваат дека просторот за одлучни чекори брзо се затвора.
Критичниот момент од партијата на Али Ахмети го гледаат во истекувањето на рокот за уставните измени и додаваат дека веќе нема простор за одложувања, изговори или манипулации „со кои би се избегнало неизбежното“.
„Уставните измени не се само правна обврска, тие претставуваат морален и стратешки императив кој обезбедува нашата држава да остане на патот кон европската интеграција. ДУИ секогаш била гарант на овој процес и нема да дозволиме политички блокади да ја попречат иднината на нашите граѓани“,
се вели во соопштението од ДУИ.
Времето за колебање помина, порачуваат од партијата и ги повикуваат сите политички актери да постапат, одговорно, зрело и решително во интерес на граѓаните и државата.
„Нашата одговорност не е само кон нашите гласачи, туку кон целата држава. Ги повикуваме сите страни да ги стават интересите на Северна Македонија и нејзините граѓани на прво место и да дејствуваат во согласност со европските аспирации кои нè обединуваат сите“,
се вели во соопштението.
Ова, како што наведуваат од ДУИ, подразбира исполнување на обврските од Преговарачката рамка и итно донесување на уставните измени, што ќе го отвори патот за следните чекори за нашето членство во Европската Унија.
„Јасно е дека иднината на Северна Македонија е во рамките на Европската Унија. Мораме да се осигуриме дека нашите постапки ја рефлектираат волјата на народот и жртвите направени низ децениите за да се обезбеди демократска и просперитетна иднина. Наративот на страв и дневната политика го потроши своето време, сега е време за лидерство и визија. Време е за јасни одговори и решителни дејства“,
велат од ДУИ.
Реакцијата од партијата доаѓа по веста дека амбасадорите на земјите членки на ЕУ вчера едногласно одлучиле патот на Албанија за пристапување во Европската Унија да биде одвоен од Северна Македонија, а првиот преговарачки кластер официјално да биде отворен на 15 октомври.
Коментирајќи ја ваквата одлука, премиерот Христијан Мицкоски денеска изјави оти со тоа се испраќа лоша порака кон македонските граѓани и дека ниту една држава не направила повеќе работи од нас во последните две и пол децении од почетокот на патот кон полноправно членство во Унијата, а кои немаат врска со Копенхашките критериуми.
„Ние сме единствениот случај во кој билатерални договори се услови во Преговарачка рамка“,
изјави Мицкоски.
Тој рече дека ако како влада можеле да го испочитуваат Преспанскиот договор и покрај критиките од јавноста, и да ја користат додавката „Северна“ за надворешна употреба, тогаш и Брисел треба да го прифати Договорот за добрососедство со Бугарија, во кој, како што вели, никаде не стои дека услов мора да биде промена на Уставот.
Лидерот на опозицискиот СДСМ, Венко Филипче, одлуката на амбасадорите на зeмјите членки на Европската Унија ја оцени како тежок пораз на политиките на Владата на планот на европската интеграција на државата, но пред сè како огромна катастрофа за иднината на граѓаните.
Најголемата трагедија, рече Филипче, е што ВМРО-ДПМНЕ всушност сака повторна билатерализација на преговорите со ЕУ и спорот со Бугарија. Говорејќи во таа насока, тој рече дека премиерот Мицкоски е свесен дека со реторика на расправии и конфликти може да добие само полош договор, но, како што заклучи, тоа е и целта.
Одвојувањето на С Македонија и Албанија од патот кон ЕУ од вчера е една од главните теми во бугарските медиуми и политички кругови. Денеска за ова свои коментари дадоа поранешните премиери на Бугарија, Бојко Борисов и Кирил Петков. И двајцата ги повикаа властите во Северна Македонија да одлучат дали ќе ги внесат Бугарите во Уставот или патот на државата кон ЕУ ќе остане затворен.