Клучни за одлуката беа конзистентните напори на бугарските институции низ годините, а особено во последните месеци – заложби кои на прво место го имаат предвид националниот интерес, но и европските вредности и приоритети
Параметрите на Одлуката на бугарскиот парламент се засноваат на предлогот на француското претседателство и не поставуваат услови надвор од оние за кои веќе се разговараше во дискусиите во Европската унија и во текот на билатералните преговори со Република Северна Македонија
Министерот за надворешни работи, Бујар Османи, во вчерашното издание на „360 степени“ на ТВ Алсат, рече дека се надева оти корекциите што во последен момент ги усвои бугарскиот парламент во одлуката за прифаќање на францускиот предлог „даваат основа за да има разбирање за нашите позиции во процесот“
Бугарското МНР денеска објави официјален став, откако вчера бугарското Собрание усвои резолуција со условите под кои Бугарија ќе го укине ветото за Северна Македонија.
„Четириесет и седмото Народно собрание на Република Бугарија донесе историска одлука да го поддржи отворањето на патот за пристапување на Република Северна Македонија во Европската Унија под конкретни параметри. Во овој контекст, Националното собрание очекува Советот на министри да ги одобри Рамката за преговори и заклучоците на Советот формално предложени од актуелното француско претседателство, како и да го потпише Записникот од Втората седница на Мешовитата меѓувладина комисија според чл. 12 од Договорот за пријателство, добрососедство и соработка со Република Северна Македонија, за чии главни параметри е постигнат начелен договор со Скопје“,
се вели во соопштението.
Понатаму, се наведува дека одлуката на бугарското Народно собрание не би била можна без, како што се вели, цврстата посветеност на Франција, како ротирачки претседател на Советот на Европската унија и другите земји-членки на Европската унија, за стабилноста и просперитетот на Унијата и на Западен Балкан.
„Пристапот предложен од Претседателството има за цел да најде заемно прифатливи решенија кои се во интерес на Европската унија и Западен Балкан, вклучително и во светлината на руската воена агресија во Украина. Клучни за одлуката беа конзистентните напори на бугарските институции низ годините, а особено во последните месеци – заложби кои на прво место го имаат предвид националниот интерес, но и европските вредности и приоритети“,
велат од бугарското МНР.
Оттаму објаснуваат дека параметрите на Одлуката на бугарскиот парламент се засноваат на предлогот на француското претседателство и не поставуваат услови надвор од оние за кои веќе се разговараше во дискусиите во Европската унија и во текот на билатералните преговори со Република Северна Македонија.
„Оваа одлука ја одразува широката поддршка на партиите застапени во парламентот во Народното собрание на Република Бугарија за европската иднина на сите шест земји од Западен Балкан“,
велат од МНР и додаваат дека се подготвени да пристапат кон потпишување на Протоколот согласно член 12 од Договорот за пријателство, добрососедство и соработка со Република Северна Македонија.
„На потег се одговорните фактори во нашата соседна земја да ја покажат, не со зборови, туку со дела, својата посветеност и желба за сопствената, и за онаа на регионот, европска иднина. Брзината со која Република Северна Македонија ќе пристапи кон членство во Европската Унија зависи од тоа и нема да одложи доколку земјата ги исполни обврските кон европските вредности и добрососедските односи“,
се вели во соопштението од бугарското МНР.
Министерот за надворешни работи, Бујар Османи, во вчерашното издание на „360 степени“ на ТВ Алсат, рече дека се надева оти корекциите што во последен момент ги усвои бугарскиот парламент во одлуката за прифаќање на францускиот предлог „даваат основа за да има разбирање за нашите позиции во процесот“.
„Секако дека и бугарските позиции се земени предвид во дефинирање на овој пакет, бидејќи за да даде согласност Бугарија сакаше да ги види и своите позици“,
рече Османи.