Во Основниот кривичен суд во Скопје денеска треба да продолжи судењето за случајот „Рекет“ каде што обвинети се Бојан Јовановски-Боки 13 и Катица Јанева.
На денешното рочиште е предвидено да се изведуваат материјални докази предложени од одбраната на Боки, па така се очекува да се презентираат фотографии од облеката на Јовановски со кои тој и неговиот адвокат ќе сакаат да докажат дека таа е купена многу пред периодот за кога обвинителството тврди дека бил правен рекет и дека дел од парите се переле преку купување скапа гардероба.
И на минатото рочиште се презентираа дел од материјалните докази на Боки. Меѓу нив имаше заверени изјави на нотар од фудбалерот Стевица Ристиќ во која тој кажува дека во август 2017 му позајмил на обвинетиот 125 000 евра и од српскиот композитор Александар Радуловиќ и неговата сопруга, текстописецот Марина Туцаковиќ, во која тие исто така наведуваат дека му давале пари на Боки.
Во листата имаше и материјални докази за продажба на имот од баба му на Боки, Евгенија, како и за денационализација на имот од која добил 300 000 евра.
Откако ќе се заврши со материјалните докази на Јовановски, судскиот процес треба да продолжи со испитување сведоци и презентирање докази од страна на одбраната на Јанева. Меѓу нејзините сведоци се и поголем дел од обвинителите кои работеа во СЈО. Нејзината одбрана најави дека ќе бара дел од докази и сведочењата да бидат на затворено рочиште бидејќи ќе стане збор за предмети кои се отворале во СЈО, односно се во предистражна и истражна фаза.
Јовановски во „Рекет“ е осомничен за примање награда за противзаконито влијание и за перење пари, а Јанева за злоупотреба на службената положба и овластувања.