Малиновски: Не значи дека нема да одговараат дури и ако помине рокот на СЈО

Автор: Васко Попетревски | пред 9 месеци | Дебати

Во дебата за „360 Степени“, поранешниот претседател на Државната комисија за спречување на корупција, Драган Малиновски зборуваше за рокот кој СЈО согласно постоечкиот закон го има за покренување обвиненија, и што би се случило по поминувањето на рокот.

- Задача на СЈО е да спроведе квалитетни истраги и добро да ги подготви обвиненијата. Дали ќе се стигне и во кој рок ќе се стигне, се разбира дека притиска времето, меѓутоа не би го довел квалитетот во прашање. Затоа што рокот е за поднесување обвиненија - рече Малиновски.

Тој рече дека ако за некои постапки не бидат оформени и испорачани обвиненија во определениот рок на СЈО, тоа не значи дека за тие кривични дела нема да се одговара понатаму.

- Проблем е што нема да ги работи СЈО, туку некое редовно обвинителство. Недозволив е ставот - аха, да, сега ќе му помине рокот на СЈО и тие ќе бидат слободни и неказнети. Не. Мој став е дека тие кривични дела за кои нема да биде покренато обвинение, ќе може да ги работи други обвинителство, поквалитетно кадровски екипирано, и порастеретено од политички влијанија, така да, дефинитивно, не може да се смета дека тие кривични дела ќе бидат згаснати и нема да се одговара за нив - рече Малиновски.

Целата емисија погледнете ја на следниот линк.